何西阿書 6章1節 到 6章11節   背景資料  上一筆  下一筆
先知文獻ê一個特色,就是有譴責,m̄-koh mā有鼓勵,呼籲人民回歸到上帝面前,上帝會珍惜kah祂訂立永遠之約ê子民,因為祂是疼ê上帝,bē輕易受氣,mā bē永久受氣,koh khah重要ê,上帝「常改變心意不懲罰人」(參考詩篇一○三:8—9,約拿書四:2,彌迦書七:18—19)。這mā是先知何西阿所beh傳達ê中心信息。

Tī第五章15節講上帝beh「棄sak」以色列人民,「直到in知罪tńg來」chhōe祂為止,主要目的是beh hō͘ in「tī苦難中,in會迫切地走chhōe上帝」,chit種情形就ná同以前in祖先tī埃及受苦ê情形仝款,tī無法度忍受奴役生活ê苦難ê時,in就會發生哀聲走chhōe上帝ê憐憫kah幫助(參考出埃及記二:23—24)。Án-ne講起來,上帝並m̄是真正hiat-ka̍k in,mā m̄是m̄-chhap in,卻是用chit種方式teh等待kah期待in悔改來歸向上帝。可能是先知何西阿傳出chit-ê信息後,tī以色列人民中間有反應pah,因為án-ne,先知何西阿趕緊呼籲in tio̍h「歸向」上帝。

第1節,起頭ê第一句是「來ah」,這是呼籲,而且是大聲hoah ê聲音,這顯然是來自先知何西阿ê呼叫聲。伊可能是行上街頭teh呼叫,tio̍h以色列人民認真聽,mā tio̍h確實地悔改「歸向」上帝,這「歸向」一詞是teh指「悔改」、「重歸和好」ê意思。原本是離開、分裂ê,現在回轉過來,表示認錯,願意重新開始ê意思。續落來引用申命記第三十二章39節ê詩歌,說明過去「拆裂」ê傷痕,上帝會「醫」mā會「包紮」。

第2節,「過兩三工」,意思是teh指「極短ê時間內」ê意思。先知何西阿傳出上帝ê信息講,只要以色列人民真正悔改,上帝ê拯救kah赦免真緊to̍h會臨到。

第3節,ē-sái講是chit本先知書ê主題之一—認bat上帝。先知何西阿用「盡力追求認bat上主」,是teh指tio̍h明白性命ê主到底是甚麼人。當以色列人民真確認bat上帝後,就會明白為甚麼會有「曙光」溫暖tio̍h大地,為甚麼會有「春雨滋潤大地」ê原因。

第4到6節,kui本何西阿書ê中心信息就tī chit短短三節經文中。先知何西阿一再呼籲以色列人民tio̍h悔改,而且一定tio̍h tùi真實ê心內開始,m̄是只有tī外面表ê行動。因為上帝看ê是人ê心內,知影in是m̄是真實á是虛假。Chia上帝特別指出以色列人民對上帝ê疼是目nih-á ê,ná親像「早起ê霧,一目nih久就消了」。Chit句話一定tio̍h kah第6節ê獻燒化祭同齊聯想來看;當teh獻祭ê時chūn,hiah-ê煙冉冉升高,聞起來真香,火燒ê火焰看起來真壯觀,m̄-koh一下á就無à。因為án-ne,上帝透過先知何西阿對以色列人民提出上帝所要求ê,並m̄是人所獻ê牲祭,卻是「疼」kah「認bat」上帝。愛,是teh指kā上帝ê「疼」呈現出來,是tī社會生活上有公義、對貧困ê人有疼心。認bat,是teh指kah立約有關,mā就是對上帝beh忠心,不含糊、不欺騙。

第7節,「tī亞當背判我」,這「亞當」是teh指靠近約旦河kah雅博河會合處ê一個村鎮,離耶利哥城南方大約有二十公里遠(參考約書亞記三:16),這意思是teh指in tī各地lóng有犯罪ê記錄,即使是tī偏遠ê小村鎮mā是仝款。M̄-koh有kóa版本kā chit句翻譯做「如亞當背約」,mā thang án-ne瞭解:以色列人民「如亞當」仝款,無遵守上帝命令,食了hit叢禁止食ê果子樹ê果子,而受tio̍h上帝嚴厲ê懲罰(參考創世記三:17—19)。

第8節,提起以色列人民tī「基列」城犯罪,m̄-koh並無說明是甚麼罪行。Mā可能kah士師記第十二章1到7節有關基列人大屠殺以法蓮人ê事件有關;tī hit-pái事件中,總共「有四萬兩千人被刣」,he是tī耶弗伊做以色列士師ê時代發生ê事。M̄-koh mā有另外一個可能,就是根據列王記下第十五章25節ê記載,是發生tī主前740年ê時chūn,hit時因為以色列ê王比加轄有一位將領利瑪利,伊ê kiáⁿ「比加,帶tùi基列來五十人造反,tī撒馬利亞王宮內院刺刣比加轄,篡了伊ê王位。」

第9節,則koh一pái提起祭司ê問題。第一pái是tī第四章7節提起祭司對上帝不忠,先知何西阿講祭司是「人數jú chē就jú大膽得罪上帝」。Tī chia特別清楚指出chiah-ê祭司kah強盜仝款,「成群埋伏,結夥phah劫」,甚至iáu會「謀財害命」,這實在是真恐怖ê事。

第10到11節,lóng提到à整體以色列民族ê共通問題,就是玷污了家己kah神聖上帝ê約,去拜偶像神明。這mā是先知何西阿tī本經冊中一再提起以色列民族共同ê罪,就是棄sak上帝,去拜巴力。雖然先知何西阿是針對北國以色列人民傳上帝ê話kah信息,卻mā提起猶大有仝款ê問題。因為án-ne,上帝m̄-nā beh懲罰北國以色列人民,mā準備ài懲罰南國ê猶大以色列人民。

重新查詢 專卷研經 何西阿書系列
錯誤回報,請聯繫