何西阿書 13章1節 到 13章16節   背景資料  上一筆  下一筆
歷史是一面鏡子,對過去ê錯誤有反省作用,tī美好腳跡頂面thang留落來真好ê見證,mā thang導正下一代ê跟隨者。

Chit章ē-sái講是tùi第二到十二章ê一個總結,因為án-ne,teh寫作上真自然tek就會看tio̍h真chē重複ê詞句。親像第2節ê「親嘴」,thang比較khah第四章14節ê「kah神廟娼妓行淫」;第十三章6節ê「Lín竟然kā我bē記得」,thang比較khah第二章13節「Kā我忘掉」。Chit章koh一pái看tio̍h作者提起出埃及ê歷史事件,表示其中有特別ê意義。

第1節,「以法蓮」,這是北國以色列siōng重要ê支族,siōng有影響力,可能kah北國以色列當初建國ê時就是tī以法蓮所屬ê「示劍」宣示對抗南部猶大有關(參考列王記上十二:25)。Chit章就是用「以法蓮」來teh代表北國以色列。
Koh講,mā thang用比較khah廣義ê認bat來瞭解chia所講ê「以法蓮」指ê是北國以色列siōng顛峰ê時代,它ê影響力震撼以色列所有民族。

Chit節提起「以法蓮敗巴力,犯罪」,表示in已經棄sak了上帝,結果kan-taⁿ會為in帶來死亡而已。

第2節,先知何西阿特有ê觀點,就是以色列人民kah上帝之間ê關係是「夫妻」,「夫妻」表達親密ê方式就是「接吻」。先知何西阿講以色列人民m̄-nā獻祭,而且是kah巴力金牛偶像「親嘴」。換句話講,以色列人民已經是kah巴力金牛像有「親密」關係,就ná仝一個bó͘背叛丈夫,去kah別ê cha-po͘人有親密關係仝款。迦南人拜巴力ê禮儀之一,為tio̍h表示對巴力神明ê尊崇,除了跳舞獻祭之外,mā會去chim嘴金牛神像。

第3節,chit節論講ê是上帝對以色列人民ê懲罰,是beh hō͘ in ná親像「晨霧朝露」,這是teh指kui個國家將真緊to̍h會滅亡,民族會被外國人俘虜伊去,ná親像糠秕仝款,風一吹就消散。意思是無穩定ê氣力,是空ê,會tòe風漂流四散。

第4節,chit節koh一pái提起耶和華上帝就是拯救以色列人民出埃及ê上帝,這tú好teh說明:如果無耶和華上帝ê拯救,就無現在以色列人民。因為án-ne,bē記得耶和華上帝,乃是siōng驚人ê罪。「除了我,lín無上帝;獨獨我是lín ê救主」,chit句話thang比較khah出埃及記第二十章2到6節所提起ê「上帝十誡」。十誡一開始就提起:「我是上主 — 你 ê 上帝,bat chhōa 你tùi 埃及地,tùi 做奴隸ê 家出來ê。(全民版)」(出埃及記二十:2,申命記五:6)

第5節,講tio̍h出埃及了後,進入曠野ê性命經驗。一提起曠野,除了表示上帝kah以色列人民有過siōng「親密」ê關係外(參考二:14、十二:9),mā同時teh說明上帝對以色列人民確實是照顧得無微不至。Tī he無食物、飲水thang用ê曠野,上帝特別準備連in ê「祖先都無食過」ê嗎哪kā in賜福食(參考申命記八:3),mā因為án-ne,以色列人民稱chit種嗎哪乃是「天頂ê糧食」(參考約翰福音六:31)。Tī曠野無水ê所在,上帝hō͘石磐湧出泉水kā in賜福lim(參考出埃及記十七:1—7,民數記二十:2—13)。上帝照顧以色列人民,就ná同父母teh照顧家己ê kiáⁿ仝款,祂hō͘以色列人民tī曠野漂流四十年期間,m̄-nā lim食不缺乏,iáu hō͘以色列人民ê「衫褲無穿破,腳mā無行腫」(參考申命記八:4)。

第6節,講tio̍h以色列人民真正ê問題所在—bē記得上帝ê恩典。Bē記得ê具體態度乃是驕傲。原因正是現在in富有,而這mā是摩西tī in進入迦南地chìn前就bat警告過ê(參考申命記八:18)。

第7到8節,chit兩節ē-sái講是何西阿書中描述上帝siōng憤怒ê懲罰情形。Chia講上帝「像獅攻擊」。而且koh khah恐怖ê是chiah-ê凶猛ê獅,m̄是kā獵物拖tńg來洞穴á是khiā起ê所在,卻是「當場吞滅」(第8節),一屑á都留情。「豹」,這mā是樹林中凶猛ê野獸之一。另外一種凶猛ê野獸是「熊」,chia形容牠「像失去幼子ê母熊」,表示非常憤怒。先知何西阿用chiah-ê siōng凶猛ê野獸來形容上帝對以色列人民背叛ê情景,已經到à無法度容忍ê地步了,決定採取嚴厲ê審判,審判ê情形ná親像chiah-ê凶猛ê野獸遇tio̍h獵物仝款,無任何一絲á ê憐憫。

第9到11節,chit段經文ê背景kah撒母耳記上第八章有密切關係;Tī該章經文thang看tio̍h以色列人民要求先知撒母耳為in立一位君王,雖然撒母耳kā上帝無仝意ê旨意kā in講,ē-sái講是in並無聽從撒母耳ê勸告,堅持beh一位君王。即使撒母耳警告in,一定tio̍h為立君王而付出koh khah大ê稅賦ê時,in á是聽bē落去chit種勸告。最後掃羅被立為第一任ê以色列國王。既然上帝依in所求hō͘了君王,m̄-koh chiah-ê君王卻lóng是帶頭領以色列人民棄sak上帝,現在上帝決定kā chiah-ê君王「廢掉」,表示以色列人民koh khah án怎都無法度有家己ê君王來管理家己。

第12節,雖然無記明以色列人民犯ê過錯是甚麼,m̄-koh卻講in犯罪ê實況lóng tī上帝ê記錄中。Chiah-ê有關以色列人民犯罪ê行踏,有kóa記錄tī仝時代ê先知以賽亞、阿摩司、彌迦,以及何西阿chit本經冊ê文獻中thang清楚看會tio̍h。

Chia講以色列人民所犯ê chiah-ê罪惡被「收藏起來」,chit句話有兩種意思;一是繼續頂面所講所講ê,上帝kā in所犯一切ê罪惡lóng記錄落來來,hō͘ in無法度狡辯。另外一個意思是teh指以色列人民kā in所做犯罪ê事包藏起來,ná親像收藏珍貴ê寶物仝款。In án-ne做,有兩種心態:其一是對所做ê惡事沾沾自喜,不時回顧家己犯罪ê記錄,其二是認為隱藏tio̍h,上帝就bē知影。M̄-koh無論in怎樣隱藏,lóng顯示了in心中已經無上帝,認為上帝m̄知mā看bē-tio̍h in所犯ê罪。

第13節,chit節是先知用譬喻ê方式來講述以色列人民真正ê問題,就是戀棧犯罪ê行為,iáu m̄知tio̍h趕緊把握機會悔改。Ná親像一個胎兒已經足月,應該會臨盆出母腹,卻iáu躲tī母胎裡無願意出來。Chit種胎兒到最後m̄-nā家己死去,mā會拖累老母hō͘伊跟tòe死去。

第14節,chit節thang清楚看tio̍h上帝ê痛苦心境。一個棄sak丈夫ê bó͘ tī外面浪蕩,面臨teh要hō͘人蹂躪致死ê時,做丈夫ê beh去解救chit-ê bó͘ mah?當以色列人民棄sak上帝,去相攬巴力神明,而現在巴力神明並bē-tàng拯救in脫離災難,因為巴力神明是虛假ê偶像神明,並bē-tàng救人,ná親像泥菩薩過江自身難保仝款。Chit-ê時chūn,上帝kám會出手拯救以色列人民?Kám會kā in tùi陰間裡救出來?如果會,上帝ê心痛必定達到siōng koân點。

第15到16節,chit兩節lóng提起上帝確實tio̍h用嚴厲ê方式來懲罰背叛ê以色列人民,上帝所用ê方式之一:是奪行in所有ê一切,二是hō͘死亡殘酷地來到in民族中間,包括嬰á lóng無法度佳哉免得。Chia提起北國以色列看起來kah-ná真興旺ê款,m̄-koh實際上chit種興旺景象並無會繼續siuⁿ久,因為上帝beh kā chiah-ê繁榮ê景象收tńg來,而且收tńg來速度之快,是in無法度想像á是預防得tio̍h ê。原因是「東風」teh beh來臨。先知何西阿講上帝beh叫東風吹乾水源kah井裡所有ê水。如果無水,累積起來ê財富有甚麼用?先知何西阿真清楚指出:「背叛」上帝ê結果,就是「死亡」。Chit節mā說明了北國以色列一定會滅亡ê訊息,因為chia清楚指出「撒馬利亞」,這是北國ê首都。主前721年被亞述帝國所毀滅,mā結束loh北國以色列ê歷史。

Chia mā提起殘酷ê畫面,就是tī戰爭ê時chūn,m̄-nā是戰士死tī戰場而已,人民mā會hō͘刣死、俘虜,甚至是連「嬰á」mā bē-tàng佳哉免得,而siōng慘不忍睹ê是孕婦被剖腹死亡。

重新查詢 專卷研經 何西阿書系列
錯誤回報,請聯繫