Chit章是屬tī「祭司文獻」ê資料。Chit種資料有一個特色，就是對數字、族譜真講究。另外一點，祭司文獻所提供ê族譜會一再重複「生男育女」chit種語句，這表示ê意義是：上帝有賜福。因為若無上帝賜福ê恩典，就無生男育女ê能力，án-ne，性命是無辦法延續落去ê。Koh講，族譜lóng記載tio̍h每一個時代ê人最後lóng「死」了（以諾除外）。這說明一個性命ê定律：人因為同房chiah有娠、生kiáⁿ、最後死亡。Tī chit-ê性命之定律中，用人ê名kah歲數構成了人類歷史ê內容。

Tùi chit份族譜中，咱mā看tio̍h性命。

Ná親像頭前已經講過ê，對性命採取殺戮、報仇ê態度，m̄是上帝所歡喜ê。因為án-ne，該隱ê kiáⁿ孫結束。Chia重新開始講述亞當ê kiáⁿ孫，就是tùi塞特開始，並且koh一pái強調這是「上帝用家己ê樣式」來造人，chit種「樣式」就是創世記第一章26節所講「上帝ê形像」，同時創造「有男有女」，並且是「賜福」hō͘人類，這賜福teh代表延續性命ê氣力。