創世記 48章13節 到 48章22節   背景資料  上一筆  下一筆
Chit段經文講述雅各祝福約瑟ê兩個kiáⁿ瑪拿西kah以法蓮之經過。

雅各teh祝福約瑟ê gín-á ê時,是雙手交叉,表示原本瑪拿西是大kiáⁿ,應該正手tio̍h下tī伊ê頭殼頂,以法蓮是第二kiáⁿ,應該是倒手chiah-tio̍h。M̄-koh,雅各卻用雙手交叉ê方式祝福,就變成以法蓮成做老大,á瑪拿西就成做老二,這kah約瑟所期待ê tú好顛倒(參考四十八:13— 14),chit件事kah以撒當年teh祝福雅各kah以掃ê事件仝款。

第15到16節,chit兩節是雅各ê祝福,主要內容teh表明傳承tùi阿公亞伯拉罕,到老父以撒所得tio̍h ê上帝賜福,透過伊領受tio̍h ê福氣,繼續傳承到chit兩個gín-á ê身上。Chit種祝福,mā等於是祝福了約瑟傳承雅各tùi上帝領受tio̍h ê一切。

第17到20節,因為雅各年老目睭花,所以看bē清楚到底toh一個是約瑟ê大kiáⁿ,m̄-koh伊卻是用交叉雙手ê方式祝福chit兩個伊認為屬tī伊ê gín-á。約瑟想beh改變,卻hō͘ 雅各拒絕。雅各表示伊真清楚toh一個是大kiáⁿ,kah伊目睭花無關係,這mā表示其中有上帝ê旨意在引chhōa雅各án-ne做。

第21到22節,除了認領約瑟chit兩個kiáⁿ以外,雅各另外hō͘約瑟一份特別禮物,就是伊用一百塊銀á向示劍城哈抹ê後代購買來ê一塊土地(參考三十三:18—20),當做送hō͘約瑟ê禮物,其實雅各án-ne做,mā teh表示約瑟比其他ê兄弟加分一份,mā隱喻約瑟擁有大kiáⁿ ê名份。M̄-koh tio̍h注意ê是,chia講雅各是「用劍用弓tùi亞摩利人奪過來ê」,這表示兩種意義:一是雅各已經擁有家己ê武裝力量。二表示hi̍t 所在不時發生征戰,無安寧過。


重新查詢 專卷研經 創世記系列
錯誤回報,請聯繫