創世記 47章13節 到 47章26節   背景資料  上一筆  下一筆
Chit段經文講出約瑟ê糧食政策,tùi物件兌換,直到最後埃及人民lóng成做國王ê「奴隸」為止。

第13到14節,「饑荒非常嚴重,四界缺糧」,chit句話說明當年約瑟提起ê七年大糧荒確實應驗,嚴重到埃及人lóng餓到「體力衰弱」。In只好用金錢來向國王購買糧食,約瑟kā錢交到王宮,表示國王因為án-ne soah富裕起來。

第15到17節,這是第二個步數,約瑟ài埃及人無錢買糧ê,用「馬、羊、牛、驢」等牲畜來換糧食,結果民間ê牲畜lóng兌換糧食去à,á伊ê兄弟則為國王看管牲畜。

第18到19節,這是第三個步數,埃及人連家畜lóng無ê時chūn,只好變賣in ê田地kah國王交換糧食,á in就成做國王租田地hō͘ in耕耘ê佃農。Án-ne,全國ê土地lóng變成國王ê。

第20到21節,chit兩節ē-sái講是第13到26節chit段經文ê結論,kā它編輯tī chia,讀起來m̄是真順。主要teh說明,約瑟ê糧食政策,致使埃及人民後來lóng成做國王ê奴隸、財產。

Chia一開始就講「饑荒koh khah嚴重」,比起第13節饑荒顯然是koh khah嚴峻地臨到à埃及。

第22節,注意約瑟ê政策hō͘權貴階級ê人lóng享受佔有土地ê特權,chiah-ê人就是祭司,m̄-nā無需要變賣土地,iáu thang「tùi王領受生活津貼」,這mā造成了階級ê對立。

第23到24節,chit兩節應該編輯tī第19節後面會比較順。就是為tio̍h beh hō͘土地thang tī饑荒年代mā ē-tàng試種作落去,伊採取「五分之一」ê田賦,kah提供種籽hō͘農民去種作。其實,會有嚴重糧荒,就是因為種作無法度生產chiah會有ê結果。因為án-ne,即使提供種籽,mā種bē出糧食,就算有土地mā是枉然,最後,in只有ē-tàng做國王ê奴隸,因為全國糧食lóng是約瑟teh控制發放。

第25到26節,chit兩節主要teh說明埃及人變成國王ê奴隸,以及埃及有五分之一田賦ê背景來源。

重新查詢 專卷研經 創世記系列
錯誤回報,請聯繫