創世記 47章1節 到 47章12節   背景資料  上一筆  下一筆
Chit章是由「祭司文獻」(第5到6節a句、第9到11節、第28節),kah其餘lóng是「耶和華文獻」ê資料混合編輯而成ê。

Chit章主要teh說明約瑟án怎辦理放糧ê政策,mā tùi chia看到落尾伊kā埃及全國人民lóng變成國王ê「奴隸」;意思是因為糧食缺乏ê問題,為tio̍h生存落去,大家lóng變成國王ê「財產」。

Chit段經文講tio̍h約瑟禮貌上一定tio̍h帶伊ê兄弟kah老父去晉見埃及國王。
第1到6節,chia講雅各ê家族是tòa tī「歌珊地區」。歌珊,chit-ê字tī希伯來文是「邊疆」意思,m̄-koh tī埃及人ê眼中卻是「國中siōng好ê地區」(參考第6節、11節,對照四十五:18)。根據民數記第十一章5節ê記載,以色列人民(雅各後來tī埃及ê kiáⁿ孫)tī埃及ê時,是「常食魚,m̄免開錢;iáu有黃瓜、西瓜、韭菜、蔥、蒜等好食ê物件」,因為這地方土地相當肥沃,chiah有án-ne豐富ê物產。Mā因為án-ne,雅各家族tī chit-ê地方chiah ē-tàng快速成長,「以色列人gâu 生koh gâu 湠,人口加添真chē koh 興旺,非常強盛,充滿hit-ê 所在。(全民版)」(出埃及記一:7)m̄-koh卻mā因為án-ne,後來遇tio̍h埃及人ê嫉妒、不滿。

第2到4節,當約瑟帶領伊ê「五個兄弟」去見埃及國王ê時,就ná親像約瑟所料到ê,國王問約瑟ê眾兄弟是「Lín做甚麼頭路?」?佳哉,約瑟有事先kā伊ê兄弟提起過,一定tio̍h講是「以放牧牲畜為生」。伊ê眾兄弟就照án-ne回答埃及國王,並且提請國王允准in tòa tī歌珊地區。

第5到6節,埃及國王一嘴就答應落來,並且mā ài in幫忙「看管伊ê牲畜」。這對雅各一家人來講,真正是非常難得ê好機會kah禮遇。

第7到8節,約瑟mā引領伊ê老父雅各去晉見國王。Chia講雅各看見國王ê時,就kā國王祝福,chit-ê意思是teh指禮貌上講祝福ê話。Koh講,因為雅各比國王ê年紀大,年長ê kā少年ê祝福,mā是當時中東地帶ê一種禮節。

第9到12節,埃及國王一下見tio̍h雅各,就問伊幾歲?雅各回答講「有一百三十歲」,m̄-koh伊強調講chit種年紀「koh短koh苦」,遠不如伊ê祖先。這是一種謙卑、禮貌ê回答,伊用chit種方式來表達生活ê境遇真苦,特別是chit-má koh tú-tio̍h大饑荒,佳哉有埃及國王收容in。

第12節ē-sái講是為雅各ê家族帶來極大ê福利,因為in tī糧荒ê時代,大家lóng需要用盡家產chiah ē-tàng兌換到糧食維生,á in卻thang得tio̍h免費ê配給糧食,同時因為替國王飼家畜,iáu有犒賞thang the̍h。


重新查詢 專卷研經 創世記系列
錯誤回報,請聯繫