Chit章繼續第四十三章描述雅各因為存糧已經用盡，koh一pái差遣眾細kiáⁿ到埃及買糧ê情形，講述約瑟án怎設計以知影伊ê眾兄哥對待年老ê老父雅各kah年輕ê小弟便雅憫ê態度。chit章ê主題中心，是用猶大對約瑟ê表白做主軸，充分說明猶大後來繼承「大kiáⁿ」名份ê角色kah意義。Tī前一章提起猶大出面向雅各表示伊願意負起便雅憫安危ê責任，chit章則描述猶大就tī約瑟beh「扣」落來便雅憫ê時，伊出面解釋一定tio̍h負起擔保責任ê原因。猶大向約瑟表示願意「終生擔受罪責」做奴隸（第33節）。chit章內容有真大部分是重複敘述in出發前，tī厝裡雅各kah伊眾細kiáⁿ ê對話。

約瑟命令管家hō͘伊眾兄弟ê糧袋裝滿糧食，並且koh khah重要ê是「Kā各人ê錢khǹg tńg去袋子裡」，chit種情形kah第一pái去買糧ê時ê情形仝款（參考四十二：35）。Á chit-pái in帶去ê錢是雙倍，原因是beh kā第一pái買糧ê錢mā歸還（參考四十三：12）。chit-má約瑟koh一pái kā chiah-ê錢lóng全部khǹg tī in ê糧袋中，á in kah第一pái買糧ê時仝款，並m̄知約瑟koh kā全部ê錢khǹg tńg去in ê糧袋中。

第2到3節，因為約瑟ê命令，除了埃及國王ē-tàng改變外，全埃及國ê人lóng一定tio̍h遵守。約瑟命令管家除了kā雅各ê gín-á帶來ê錢全部lóng khǹg tńg去in ê糧袋，同時iáu beh kā約瑟專用ê「銀酒杯」hē tī便雅憫ê袋子中。管家只有ē-tàng聽從約瑟照án-ne去做。隔工就hō͘雅各ê 眾kiáⁿ離開tńg去厝裡。In終其尾順利地kā西緬kah便雅憫chhōa tńg來。

第4到5節，續落來約瑟koh命令管家帶人去追雅各ê眾細kiáⁿ，並問in為甚麼「以惡報善」，偷the̍h宰相ê「銀酒杯」，強調he是宰相mā用來「占卜」ê神器，講in「犯嚴重ê罪」。管家當然知影這一切經過，m̄-koh伊只有ē-tàng照宰相ê話去做。