創世記 42章1節 到 42章17節   背景資料  上一筆  下一筆
Chit章mā是用「以羅伊文獻」為主軸,加上第2節、第4到5節、第7節、第27到28 節、第38節是用「耶和華文獻」ê資料編輯而成。

對雅各來講,約瑟ê事早已經過去,甚至認定伊已經被野獸所吞食(參考三十七:33)。換句話講,tùi第三十八章到四十一章,是插入「以羅伊」典ê大部分資料,致使雅各以及伊gín-á kah約瑟之間關係ê連續故事中斷à。編輯者利用chit段插入ê資料詳細紹介了約瑟受賣到埃及後ê發展。然後,tī第四十二章用迦南地大饑荒,hō͘原本雅各kah約瑟之間斷了ê音訊,開始有一絲連線ê發展。因為án-ne,chit章mā thang講是約瑟故事ê第二個階段。

Tùi chit章開始到第四十六章,lóng是用約瑟kah伊ê眾兄弟會面ê經過為主軸,以及後來連in老父雅各mā kah伊會面。Chit段故事mā tú好應驗了以前約瑟所作ê「夢」(參考三十七:9)ê實現。

開始chit句「埃及有糧食」,tú好回應了第四十一章49節,tī約瑟管理下ê埃及,kā七年豐收期間儲存起來準備饑荒來臨ê時thang用ê糧食。

埃及,自古以來一直是中東地區ê糧倉,á迦南地則不時發生饑荒(參考十二:10、廿六:1-2)。chit-má是koh一pái發生饑荒,迫hō͘雅各一定tio̍h差派gín-á去埃及買糧。

第1到4節,當雅各聽tio̍h「埃及有糧食」,就差遣伊ê 眾kiáⁿ去埃及購買。M̄-koh雅各kā伊疼ê拉結所生尾子便雅憫留tī身邊。這可能kah雅各認為約瑟已經往生,伊無法度koh再hō͘便雅憫koh死去有關。

第5到9節,雅各ê kiáⁿ一到埃及,就去見約瑟,beh向伊買糧食。因為伊已經是埃及首相,而且管理糧食政務,á這mā是當時siōng重要ê政務,伊thang決定賣á是m̄賣。當chiah-ê眾兄哥一下見tio̍h約瑟,隨時就「坦覆 (thán-phak)tī土腳叩拜」,chit句話tú好回應了第三十七章7節約瑟所做ê夢。Koh khah重要ê,是經過十gōa年時間,伊ê眾兄哥早已經bē記得伊,而且bē認得伊,m̄-koh約瑟卻一見面就認出是伊ê眾兄哥。因為án-ne,故意問in tùi tó位來?並且假做懷疑in是來做偵探,並m̄是真正beh來買糧食。

第10到13節,chiah-ê眾兄哥回答否認約瑟ê質疑,甚至自認是「老實人」。這聽tī約瑟耳中,一定會感覺真荒謬。因為án-ne,伊故意koh一pái強調in是「探子」,m̄是「老實人」。Chiah-ê眾兄哥為tio̍h beh證實家己ê清白,就kā身世背景小khóa說明一下,m̄-koh in講「有一個小弟已經死去」,in並m̄知hit-ê in眼中認為已經死去ê小弟,就khiā tī in面前。

第14到17節,chia約瑟第三pái指控伊ê眾兄哥是「探子」,並且ài in tńg去帶siōng小ê小弟便雅憫來hō͘伊看,若無,就無法度證明所講是真。為tio̍h án-ne,iáu拘禁in「三工」。約瑟chit種做法ē-sái講是hō͘伊ê眾兄哥一個下馬威。

重新查詢 專卷研經 創世記系列
錯誤回報,請聯繫