Ē-tàng看出約瑟確實是有上帝同在，是一個真有智慧ê人，雖然伊是希伯來青年，m̄-koh m̄是埃及人眼中真低級ê人。

伊先kā兩個夢看做是一個，並且kā「七」這數字真清楚講出時間，就是「七年」，而且這七年所呈現出來ê，是kui個環境問題，包括有七年ê豐收kah七年ê嚴重乾旱。Á豐收是超過人所ē-tàng想像ê豐富，相對ê，乾旱ê嚴重性，是到人所無法度想像kah承受會tiâu ê狀況。

第25 kah第28節，約瑟兩pái強調上帝「已經kā家己ài做ê事預先kā國王講。」，chit句話充分表示上帝是透過chit兩個仝款ê夢，向埃及國王講話，同時mā表示夢裡所傳達出來ê信息必定會實現ê意思。這mā是約瑟tī第32節向國王所講ê。

第33到36節，chit段經文是約瑟對埃及王ê建議，可見約瑟m̄-nā解夢，iáu進一步提出án怎去預防以後七年嚴重乾旱所帶來ê問題。

伊提出幾點建議：1.是起用「有智慧有遠見ê人」，派chit種人「管理國政」。

是teh指派官員tī七年ê豐收年間徵收「農產物ê五分之一」。3.Tī豐收年中「儲備糧食，派人管理」。Án-ne，大量囤糧落來chiah有辦法tī飢荒年期間「thang供應全國人民」糧食ê需要，「hō͘人民bē致使餓死」。

約瑟chit種表現，m̄-nā是tī解夢，真正重要ê是伊kā tùi夢中看見ê異象，提出建議來預防beh發生ê災難。Án-ne chiah是真正智慧。