創世記 40章1節 到 40章15節   背景資料  上一筆  下一筆
Chit章lóng是「以羅伊文獻」ê資料,其中第1節、第3節、第5節、第15節,是編者加添入去ê資料。

這是約瑟tī埃及受難ê第二個記事。是用解夢來表達約瑟kah上帝有特殊ê關係。「夢」是「以羅伊文獻」特有ê資料,作者ài用夢來表示上帝對人ê啟示。「夢」是人人lóng有ê經驗,m̄-koh若beh「解夢」,一定tio̍h有相當ê智慧chiah有辦法。Á智慧卻m̄是人人lóng有,mā m̄是ē-tàng用錢買會tio̍h。箴言ê作者講智慧是認bat上帝ê意思(參考箴言一:7、九:10)。約瑟敬畏上帝,因為án-ne,上帝賞賜hō͘伊有明白上帝旨意ê能力,chit點認bat真重要。

M̄-koh古早時中東地帶ê人認為夢是thang用來kah神明交通、來往ê一種方式,mā是上帝對人啟示祂ê旨意ê方法之一(參考民數記十二:6),因為án-ne,有能力解夢ê人往往會hō͘人看做是神明ê代言人仝款。M̄-koh有ê人就會假借「解夢」當做欺騙ê手段。摩西ê律法中真嚴格地禁止chit種行為(參考申命記十三:2—6)。

Chit章開始就講埃及王身邊有兩個高級官員—酒政長kah廚房長,被關入王室監獄,tú好kah約瑟同監獄,因為án-ne,伊被侍衛長指定服侍chit兩位高官受刑人。

Chit種巧妙安排其實lóng teh暗示著有上帝ê旨意在其中。

酒政長,這是古代真重要ê官位,是國王身邊ê官員,國王ê三餐差不多lóng會有酒政長陪伴tī邊á。因為án-ne,如果小khóa khah用心,真可能會對國王造成影響力。尼希米就bat擔任過波斯亞達薛西皇帝ê酒政長(參考尼希米記一:11),後來回國了後當省長(參考尼希米記五:14)。廚房長,這mā是王宮裡重要ê官位之一,專門負責國王ê飲食、餐點ê安全。M̄-koh chia無講in「冒犯了王」toh一kóa事。M̄-koh in各做「一個夢」。

第5到8節,「酒政長kah廚房長」對各自所做ê夢並bē了解,因此致使「心神不安」。約瑟因為服侍in,就關心地問起in心煩ê事。

「無人ē-tàng替阮解釋夢ê意思」,原因夢是tùi上帝來ê啟示,因為án-ne,只有上帝賞賜ê人才有chit種能力。約瑟鼓勵in kā家己ê夢講hō͘伊聽。

第9到11節,這是酒政長ê夢,出現ê內容是kah葡萄樹有關,á kah葡萄樹牽連做伙ê,就是葡萄酒、葡萄汁,以及葡萄餅。

第12到13節,chit段經文是約瑟為酒政長ê夢境作解析。伊強調「三支樹枝」代表「三工」時間,國王會恢復伊ê職位,hō͘伊tńg來王宮服侍國王。

第14到15節,約瑟祈求酒政長一定tio̍h會記得伊,替伊tī國王面前講幾句好話,thang hō͘伊ē-tàng得tio̍h tháu放。原因伊是「被綁架來ê」,伊並無做過甚麼pháiⁿ事。

重新查詢 專卷研經 創世記系列
錯誤回報,請聯繫