創世記 34章13節 到 34章24節   背景資料  上一筆  下一筆
注意第13節ê chit句「就用白賊話回答示劍kah伊ê老父哈抹」,chit句話表示欺騙ê行為tùi雅各ê身上流傳到伊ê gín-á身上à。Mā teh暗示雅各ê 眾kiáⁿ並m̄是有真好ê行為,這tī第三十七章koh khah明顯。

第14到17節,雅各ê 眾kiáⁿ建議用「割禮」當做條件,認為無割禮,是一種「恥辱」。M̄-koh「割禮」原本是kah上帝之間有性命ê約ê記號,無法度用來當做婚姻ê聘金á是要件。

值得注意ê是第16節,雅各ê kiáⁿ表示若同意「割禮」,in就願意kah示劍族ê人「成做一族」,這kah上帝beh hō͘亞伯拉罕、以撒kah雅各有眾多kiáⁿ孫之應允,大無相仝。因為連以實瑪利lóng無法度直接成做亞伯拉罕ê繼承人,只有以撒傳承落來ê chiah是。Án-ne,雅各ê kiáⁿ若是kah示劍族ê人合成一族,這本來ê應允就會失去意義。Tùi chia mā thang看出隱藏tī其中ê詭計。

第18到19節,哈抹kah示劍認為這是「公道」ê條件,而且因為示劍確實愛底拿,老父哈抹就決定接受chit種條件當做聘金。Mā可能伊看見ê是伊ê族群thang kā比較弱小ê雅各家族「併入」tī伊ê管轄之下。

第20到24節,「城門聚會ê所在」,這mā是聖經時代城裡居民聚會ê場所,是法院審案ê所在。

第23節thang看出哈抹kah示劍chit對父子,以及雅各ê 眾kiáⁿ是各懷鬼胎,各自盤算tio̍h本身利益。哈抹kah示劍phah ê如意算盤是:只要接受雅各眾kiáⁿ提出ê割禮做聘金,就ē-tàng藉tio̍h chit-pái ê婚姻kā雅各「in ê牲畜kah一切財產」lóng變成示劍城人民ê,這是準備以大食小ê行為,thang明顯看出in心內存「貪」ê念頭。Á這絕對bē為in帶來上帝ê賜福。後來,hit-ê城ê「男子lóng接受割禮」。

重新查詢 專卷研經 創世記系列
錯誤回報,請聯繫