創世記 25章27節 到 25章34節 背景資料 上一筆 下一筆 |
Chit段經文用來解釋chit對雙生á彼此之間ê爭吵ê原因。 第27到28節,講出兩個族群ê差別,m̄-nā是頭前提起ê外表特徵,koh khah tī人格特質上有無仝;以掃ài phah獵ê「戶外活動」,雅各卻是「好靜」。M̄-koh khah tio̍h注意ê是:「以撒偏愛以掃」,「利百加偏愛雅各」,這已經講出兩個族群之間ê問題,是kah父母ê態度有密切關係。 第29到33節,chit段經文講出雅各ê奸巧,趁兄哥以掃ê飢渴,伊用siōng sio̍k ê「紅豆湯」來換兄哥以掃siōng貴重ê「大kiáⁿ ê名份」。 第34節,大kiáⁿ名份tī東方社會是真貴重ê身分,表示thang得tio̍h老父兩份ê財產(參考申命記廿一:15—17)。M̄-koh以掃為tio̍h一碗紅豆湯,出賣了家己大kiáⁿ ê身分。表示伊看輕上帝所賞賜hō͘伊ê chit-ê「大kiáⁿ ê名份」。 Chit段經文mā teh描述傳說中有關顧羊人kah獵人之間彼此輕視、對敵ê因素,被引用來解釋以色列人民kah以東人民之間ê緊張關係。 |