以西結書 8章1節 到 8章6節   背景資料  上一筆  下一筆
Tùi第八章開始到第十章22節,這是先知以西結所看見ê第二異象。Tī chit段落中,先知以西結描述所看見ê異象,說明上帝ê榮耀已經無koh出現tī猶大人民看做siōng尊貴ê耶路撒冷聖殿中,因為猶大人民拜偶像神明ê行為大大地得罪了上帝。當上帝無koh出現tī耶路撒冷聖殿ê時,ná mā teh表示上帝已經遠離耶路撒冷,這隱喻tio̍h hit-ê城會遇tio̍h極大ê災難。Chit種觀念mā是kui本聖經ê思想中心—有上帝同在,必定安穩;相對ê,無上帝同在ê所在,必定紛亂不安。

先知以西結ê異象siōng-kài特別ê所在,就是神魂出竅四界去旅行,這mā構成了以西結書ê特色。因為án-ne,tio̍h了解以西結書,就m̄是tùi文字面來看,而是beh看文字背後所beh表達ê信息。

Chit段經文講述先知以西結hō͘上帝ê靈提起耶路撒冷聖殿北門ê入口所在,看見ê第一個景象,就是民眾teh拜偶像ê情景。這表示上帝beh對耶路撒冷ê猶大人民進行懲罰,並m̄是無緣無故,卻是有憑有據,先知以西結就是siōng好ê證人。因為伊親目看tio̍h hiah-ê偶像神明存在tī耶路撒冷聖殿中。

第1節,講出了確實ê日期就是「流亡ê第六年,六月初五日」,kā chit時間對照第一章2節ê「約雅斤王受掠後第五年」,約雅斤王是tī主前598年繼任王位,m̄-koh chiah kan-taⁿ繼位三個月,就因為巴比倫帝國圍困耶路撒冷城而受掠(參考列王記下廿四:8—12)。因為án-ne,chit-ê時間應該是主前592年9月17日。

「tùi猶大流亡來ê眾長老」,chit群長老應該是kah先知以西結仝款,lóng是hō͘掠到巴比倫ê迦巴魯(參考一:3),in 做伙去拜訪先知以西結。Tùi chia thang mā知影先知以西結已經lóng受民眾kah眾長老尊崇,確認伊是先知ê角色。Koh講,這mā顯示出in雖然被掠到巴比倫ê集中營區內,m̄-koh卻ē-tàng自由行動。就tī chiah-ê長老來拜訪ê時chūn,「至高上主ê能力忽然臨到」先知以西結ê身上。

第2節,thang參考第一章4節、26到27節。

這是用擬人筆法來描述上主ê靈。這描述ê方式真特別,講「一個kah-ná是人ê形像」出現tī先知以西結面前,而這「形像」呈現出來ê光亮ná親像「火」、像「銅發光」一般。根據馬太福音第廿八章2到3節ê描述,天使ê容貌ná親像「sìh-nà」一般ê亮光。

第3節,chit-ê以人形像出現ê上帝ê靈,「伸出一隻像手」,掠tio̍h先知以西結ê「頭毛」,然後就kā伊帶到「耶路撒冷」ê「聖殿北門內院ê進口處」。這表示先知以西結是kui個人被提起來。上帝ê靈kā伊帶到耶路撒冷城聖殿ê北門;這是tùi聖殿外院通往內院ê門,而就tī「hia有一尊觸怒上帝ê偶像」,這是此異象ê中心信息,thang看出上帝ê忿怒並m̄是無原因,就是猶大人民已經kā偶像立tī聖殿外院進入內院ê門口處,án-ne,任何tio̍h進入聖殿內院敬拜上帝ê民眾lóng會看見這尊偶像,有ê甚至會先對偶像祭拜了後chiah進入內院敬拜上帝,這表示in變成看見甚麼就拜甚麼,已經bē記得上帝是獨一ê,m̄准有任何其它神明kah祂並列ê教導。

上帝hō͘先知以西結看見這景象,án-ne伊就ē-tàng舉證說明上帝忿怒、懲罰ê原因。換句話講,先知以西結傳出ê信息是有憑據ê,並m̄是憑空捏造。

第4節,「我看見以色列上帝ê榮耀」,聖經中談起「上帝ê榮耀」ê時,lóng teh表示上帝ê權能、奇妙ê作為。

第5節,特別tio̍h注意ê是chia講「行廊進口ê祭壇邊á有一尊觸怒上帝ê偶像」,表示這偶像所在ê位置比第3節提起ê koh khah內面,是khǹg tī祭壇邊á了,án-ne,猶大人民是beh獻祭hō͘上帝neh,iáu是beh獻祭hō͘亞舍拉?換句話講,猶大人民tī敬拜上帝ê事頂面根本就搞無清楚。

Chit節講先知以西結向聖殿北pêng ê門看,這門出去就是王宮所在地,君王tio̍h進入聖殿ê時,通常lóng會用chit-ê門,有時mā被稱做「祭壇門」。Chia mā是宰殺tio̍h獻祭ê羊羔ê所在(參考利未記一:11)。因為án-ne,mā是非常重要ê地點,只要有帶cheng-seⁿ tio̍h獻祭hō͘上帝ê民眾,lóng會經過此門。M̄-koh就tī chit所在看tio̍h「一尊觸怒上帝ê偶像」,這真正是非常嚴重,mā說明君王、祭司等lóng tī拜偶像à。

第6節,真清楚說明上帝決定遠離耶路撒冷,m̄是祂歡喜án-ne,卻是猶大人民用真chē方式侮辱上帝,來「逼」上帝遠離聖殿。

Chia用「jōa-ni̍h-á 可惡」、「比這koh khah 可惡」等句話,lóng teh表達猶大人民拜偶像神明ê熱情,並bē輸敬拜上帝。

重新查詢 專卷研經 以西結書系列
錯誤回報,請聯繫