以西結書 47章1節 到 47章23節   背景資料  上一筆  下一筆
以西結書第四十七到四十八等chit兩章lóng提起有關土地ê問題,tī chia概略地敘述以色列民族各支派重新分配土地ê事,而且chit種分配是每一個支派lóng仝款。Chit種描述lóng隱含tio̍h一個用意:一個全新性命ê開始,是充滿tio̍h上帝ê賜福。

Chit段經文講述聖後面有泉水湧流出來,有水ê所在,就會有性命出現。就親像上帝創造ê伊甸園仝款,有四條河流源源不斷灌溉了kui個田園。當先知以西結講出伊看見chit種異象ê時,對以色列人民來講,有非常重大ê意義。因為水,一直是大家所渴望得tio̍h維護性命ê重要資產。因為án-ne,當先知以西結看見有泉水不斷來tùi聖殿湧流出來,而且水深到一定tio̍h siû水chiah ē-tàng渡過,這mā說明新ê耶路撒冷有上帝奇異ê恩典而且豐富有chhun,無koh有欠缺ê煩惱,hiah-ê人會充滿感謝。

第1到2節,chia講「聖殿ê門口」,是teh指聖殿ê東門,mā就是正門。M̄-koh正門現在是關閉ê,因為án-ne,先知以西結是tùi聖殿ê「北門出來」,然後行到外面「轉到朝東ê外門」。Tī chia,伊看見「有泉水tùi門入口所在下底湧出,流向東方」,ná親像啟示錄作者講ê,這泉水是tùi聖殿ê寶座湧流出來ê,而tī詩篇第四十六篇4節講,這道河流ê水是「喜樂」,是tī上帝居所chiah有ê。

Tī「聖殿南面」有水tùi「地下流出來」,chiah-ê水流「經過祭壇南邊」,然後tùi「門ê南邊流出來」。這lóng teh說明chiah-ê水,是經過上帝ê賜福而流出。注意chia講水流經祭壇,是teh表示祭壇隨時隨地lóng thang清洗保持潔淨,無論是teh獻祭chìn前,á是獻祭ê後ê潔淨工作,lóng ē-tàng真輕易完成。這teh表明以後獻hō͘上帝ê禮物lóng是siōng潔淨ê。

第3到5節,chit三節講tio̍h水ê深度,是tùi siōng淺只有到「腳踝」,然後jú往前行,水ê深度jú深,到à「腳頭u」,然後到à「腰部」,直到「深到無法度涉足過去,只好siû水chiah ē-tàng過去」,chiah-ê lóng teh象徵上帝ê恩典是豐富到無法度估計、衡量。

第6節,「留意這一切」,thang想像會tio̍h chit條河流並無任何支流注入,m̄-koh卻是tùi聖殿ê「下底湧出」,而且是jú來jú深,表示這是永遠bē缺乏、永遠bē乾涸ê水源。

第7節,「看見兩岸有真chē樹」,這kah創世記第二章15到17節,kah啟示錄第廿二章1到2節所提起ê,這河流所經過ê所在,兩旁lóng栽種tio̍h「性命樹」,樹á頂是結果子纍纍。

第8到12節,Tī chit段經文中,chit-ê導覽者kā先知以西結講chit條tùi聖殿流出泉水而成ê河渠,水流經過ê所在生機盎然,hō͘原本lóng無性命ê跡象ê死海地區,變成一片活躍、新有性命力ê海。這kah以西結書第三十七章1到14節所提起ê,hiah-ê已經枯乾ê骸骨,會因為為上帝ê靈注入,而呈現全新ê性命,甚至thang馬上成做ē-tàng進攻敵人陣營ê精兵有異曲同工ê所在。

Chia講tùi聖殿流出來ê泉水帶來ê各種變化如下:
一是當chit條河渠ê水,tùi「向東流,經過約旦河,進入死海」,致使原本是「鹹水」ê「死海」之水,變成「淡水」。這是非常奇異ê改變,大大超過人ê能力所想像會tio̍h。

二只要是chit條河渠所流過ê所在,lóng會「各種生物kah魚類」,m̄-nā án-ne,這河渠ê水會「hō͘死海ê水新鮮,水流過ê所在lóng有性命」。

三是原本無可能有生物存在ê死海,會因為chit條水源ê水注入,而變成「像地中海仝款有各種魚類」,而且是「非常chē」。「海邊會有討海人tī曝漁網」,chit句話mā teh暗示來chia掠魚ê人真chē。

四是「河ê兩岸會有各種樹木生長結實」,chiah-ê樹ê「果子thang做食物」外,它ê「葉á thang做藥材」。

注意第11節特別提起,這河流所經過ê所在,特別是死海有大改變,「沿岸ê沼澤kah池塘ê水猶原是鹹ê」,án-ne就ē-tàng提供日常生活上所需要鹽。

「隱‧基底」,這是tī死海西岸中部ê一個城鎮,現在iáu-koh保持chit-ê名。Chia有一個深泉。

「隱‧以革蓮」,真可能是設tī死海西北面,tī昆蘭附近,mā有深泉。

Tùi chia開始直到第四十八章,lóng是談起有關以色列民族十二支族分配ê土地範圍。

第13到14節,chia講tio̍h以色列民族「十二支族」ê「地界」,特別強調講「約瑟支族會得兩份」,這kah雅各臨終前ê吩咐有關(參考創世記四十八:5),後來十二支派就是由約瑟ê kiáⁿ以法蓮kah瑪拿西兩個取代約瑟kah利未。

Chia強調「tio̍h公平分配土地」,這是上帝「賜kā in賜福做產業」ê土地。表示in tńg去巴比倫故鄉後,重新分配土地ê時,就無koh像所羅門王死後,國家分裂為南北二國。卻是合一ê國家kah十二支族。

第15到20節,chit段經文談起東、西、南、北等四面ê範圍。Chit段有關分配土地ê事,mā thang參考民數記第三十四章1到12節。

第15到17節,事(tāi)先談及ê是「北pêng ê地界」。

第18節,這是「東邊ê地界」。

第19節,這是「南邊ê地界」。

第20節,這是「西邊ê地界」。聖經時代,西邊是siōng安全ê所在,因為西邊就是靠近地中海防守khah容易,敵人若beh tùi海路攻擊,一定會有真好ê船隻、運輸等交通工具裝備,否則無法度攻擊。

第21到23節,「各族beh分chit塊土地」,chit句話已經teh表示無甚麼人比較khah特別,而且值得注意ê,就是「外僑kah in tī chia出世ê kiáⁿ lóng tio̍h分得土地」,m̄-nā是in,iáu包括tī in中間出世ê子女,mā lóng tio̍h kah以色列人民仝款,享受土地分配權,chit點是過去所無ê。Chit種信息mā是先知以賽亞所傳出來ê,上帝應允所有歸屬祂ê人,lóng被同等看待(參考以賽亞書五十六:3—8)。

重新查詢 專卷研經 以西結書系列
錯誤回報,請聯繫