Chit章有幾個主題，一是tùi第1到6節ê經文繼續談起關係利未人生活ê關懷，二是第7到17節，有關君王應該遵守ê規則，三是第18到25節，談起Pôaⁿ過節應該ê獻祭禮儀。

Tùi chit章第5節開始，一直到第四十六章18節止，chit段經文lóng是上帝對先知以西結啟示所做ê記錄。

先知以西結有一個非常重要ê觀念，就是beh kā聖kah俗分別清楚。Tùi聖殿ê規劃kah祭祀禮儀ê規定，到祭司ê工作lóng是án-ne。現在chit段經文提起beh koh再kā土地劃分出一塊地是專門供聖殿祭司使用ê。

其實chit段落mā是為第四十七到四十八兩章記載有關分配土地ê事，tī chia預留伏筆。

第1到2節，「分配土地hō͘各支族」了後，「tio̍h留一塊獻hō͘上主」，意思是teh指保留做聖殿ê用途。Chit塊土地是「十二公里長，十公里闊」。續落來beh tùi頂面所講chit塊土地中koh「劃出一個四箍圍做聖殿用地」，chit塊聖殿用地是每邊「長兩百五十公尺」，然後koh加上「二十五公尺闊ê空地」，這表示聖殿ê外圍iáu有片空地，chit片空地就是hō͘神聖之地kah世俗之地有一個緩衝地帶。

第3節，續落來是tī chit塊ài做聖殿用地ê土地，koh劃出「一半，長十二公里半，闊五公里」當做「建造聖殿ê路用」，chit塊建造聖殿用ê土地，就kā它稱做「至聖ê地」。這mā是第四十二章16到20節所提起ê聖殿範圍。

第4節，chit塊特別劃分出來當做「至聖ê地」，是beh做建造聖殿外，mā是kā它「劃歸hō͘ tī聖殿供職ê祭司」，因為án-ne，chit塊土地會建造祭司專用ê厝。這tī第四十章45到46節lóng有記載，而且強調祭司lóng是「撒督ê後代」，chit點tī第四十八章11節mā koh一pái提起。

第5節，chia mā特別提起tio̍h另外劃出一塊地hō͘利未人，in是「tī聖殿供職ê利未人」，內面mā有利未人ê「住宅區」，這mā說明一個重要轉變，就是tī先知以西結以前，利未人是無土地ê，m̄-koh tī先知以西結ê異象中，利未人thang擁有一塊特定範圍ê土地。這mā講出了祭司kah利未人之間ê差別，因為祭司並無土地。

第6節，chit節講出「以色列人」mā thang tòa tī聖區ê「隔鄰」ê所在，chit塊地比利未人擁有ê範圍會細一半，只有「長十二公里，闊兩公里半」。

有關這部分tùi第四十七章13節起，直到第四十八章35節有koh khah詳細ê說明。