以西結書 40章1節 到 40章16節   背景資料  上一筆  下一筆
Tùi第四十章開始,一直到第四十八章止,chit段lóng是記載先知以西結所看見新ê耶路撒冷kah聖殿ê異象。值得注意ê是tī chit異象中,作者強調有泉水tùi聖殿內流出來,ná親像性命ê泉水流過仝款,過去無性命跡象ê,現在lóng呈現出一片活潑ê性命力,ná親像創世記第二章所顯示出來ê伊甸園仝款。

Chit段長到八章ê啟示經文,真可能有祭司資料ê背景,chit種資料有一個真重要ê思想主軸:一切lóng是上帝ê榮耀。Chit種榮耀是以敬拜做中心,表示人願意尊崇上帝,以上帝ê旨意為依歸。

Chit段經文描述先知以西結tī異象中看見一座設tī以色列ê高山,並且tú-tio̍h一個像銅仝款發亮ê人,chit種人beh指示先知以西結該看ê事物。Chit段經文mā同時描述聖殿外院kah東門ê情景。先知以西結並m̄是建築師,伊是先知mā是祭司。伊只是kā伊所看見ê異象記錄落來講hō͘ kah伊同在巴比倫集中營ê以色列人民聽。

第1節,chia提起「耶路撒冷陷落ê第十四年正月初十」,mā就是先知以西結等第一批hông擄去巴比倫ê以色列人民,tī異鄉「流亡ê第二十五年」。這年是主前573年。

「上主ê大能臨到我身上」,tī第三十七章1節用過,表示上帝ê靈臨到先知以西結身上,hō͘伊感受tio̍h一股極大無法度抗拒ê氣力。這力量kā伊「帶走」。

第2節,「tī異象中」,先知以西結看見「目睭前有kah-ná一座城ê建築物」出現,地點是tī「以色列地」ê「一座高山頂」,這是teh暗示錫安山,而chit座城就是teh指耶路撒冷城。

第3到4節,先知以西結看見「一個人像銅仝款發亮ê,手裡the̍h麻繩kah木尺」,chit-ê人就khiā tī城ê「門口」處。Chit-ê人ài先知以西結「詳細看,注意聽,專心注意」,chit種人ài伊kā所看見ê「一切kā以色列人講」。Chit-ê人kah-ná是一個「導覽者」,beh傳達hō͘先知以西結,好tńg去教導以色列人民。M̄-koh tùi本章第5節開始,chit種人lóng是用伊手上ê量繩tī測量,m̄-koh無講出任何ê話語。Á先知以西結可能就跟tòe chit-ê人,kā所看見ê lóng記錄落來。

第5到6節,先知以西結講伊看見ê是「聖殿,周圍有牆」,然後看見chit種人the̍h「一條三公尺長ê木尺,tú-teh量牆」,而這「牆高三公尺,厚三公尺」,然後來到à「朝東ê門洞」,這就是所講ê東門,mā就是聖殿ê正面。「外院」有三道門,就是「東、北、南」,tú好kah內院mā有三道門相對(參考四十:32)。

現在是tùi外院ê東邊洞口beh進入內院ê東門處,就是tùi外院beh進入聖殿正門ê所在,有「臺階」。這是tùi外院進入聖殿正門chìn前ê臺階,共計有二十五階,外院門口有階,內院門口有八階(參考第31節),án-ne,臺階就ē-tàng hō͘ beh進入內院ê民眾稍事停喘一下,並且整理衫褲、儀容等。Chia有一個「外玄關,有三公尺深」,就是tī chia歇一下。
第7節,tī chit厚到「三公尺」玄關了後有「甬道」,tī「甬道」ê兩旁,「各有三間守衛房」。Chiah-ê「守衛房」就是警衛teh看守,對進入聖殿內院ê人需要檢查,除了beh防範外邦人進入外,mā tio̍h檢查帶入祭壇ê cheng-seⁿ是m̄是有祭司檢驗合格證明。過了「守衛房」了後,就是一個「門廊」對tio̍h聖殿。

第8到9節,「門廊有四公尺深」。然後,接近聖殿ê「甬道」ê兩pêng lóng有「牆柱厚一公尺」,可見這是真雄偉koh有氣派ê建築。

第10節,仝款ê,teh進入聖殿ê「甬道兩旁各有守衛房三間」,tùi chia開始,進入ê聲音就beh開始降低,kah外牆ê所在無仝。喧嘩ê聲音是會馬上被禁止。

第11節,這是內院東門ê入口,其「闊六公尺半,甬道五公尺」。Chit種門,算是闊闊ê。真容易hō͘朝聖客進入內院。

第12到13節,守衛室頭前有「矮牆」,這矮牆ê作用是beh隔開聖殿警衛kah民眾。Chia ê守衛者是利未族人。

第14節,tùi「甬道」到「門廊」,甬道是五公尺,而門廊是「十公尺」,因為出了門廊就是內院空地à。

第15節,tùi大門進入到內院空間,是二十五公尺,若加上門廊ê十公尺,就有三十五公尺。

第16節,chia講外牆lóng有「小窗」,這其實是用木條子交錯起來ê窗格á,具有裝飾ê作用。Koh講,「甬道兩pêng ê牆柱lóng有雕刻tio̍h棕樹」,這mā是一種裝飾。
重新查詢 專卷研經 以西結書系列
錯誤回報,請聯繫