以西結書 38章1節 到 38章9節   背景資料  上一筆  下一筆
Chit章kah第三十九章,chit兩章lóng是談起有關歌革ê事。M̄-koh甚麼人是歌革?這一直是聖經學者teh chhōe ê問題。雖然有真chē討論chit位詞ê意思,不過,有一種講法比較khah thang接受,就是歌革是邪惡勢力ê代名詞,表示作惡多端ê世界。Mā thang用來表示烏暗kah光明tī歷史中一直彼此爭鬥。

Koh講,chit兩章有真chiok厚ê「啟示」文體內容,因為án-ne,真重視數字上ê表達,親像上帝kah邪惡ê勢力決戰,kā拾獲ê器械當做柴火用,tio̍h用七年時間chiah ē-tàng燒完,而收屍埋葬tio̍h用七個月,「七」是表明潔淨。

有趣味ê是chit兩章共分做七個段落,每一個段落ê開始lóng會「至koân ê上主」開始。這七段落是:1.第三十八章3到9節、2.第三十八章10到13節、3.第三十八章14到16節、4.第三十八章17到23節、5.第三十九章1到16節、6.第三十九章17到24節、7.第三十九章25到29節等等。

Chit段經文描述以色列人民tú tùi巴比倫被釋放tńg來故鄉,就馬上tú-tio̍h了歌革率兵tùi瑪各地區ê米設kah土巴來攻打,對chiah tú beh開始安定生活ê以色列人民帶來極大ê威脅。

第1到3節,上帝beh先知以西結「責備」瑪各地區ê「米設kah土巴兩國ê統治者歌革」。因為伊帶領軍隊來攻打tú回鄉重建家園ê以色列人民,破壞了in正想開始ê安定生活。因為án-ne,chit位「至koân ê上主」beh kah歌革chit位統治者「做對」。

第4到5節,chit節講出上帝kah歌革做對ê方式,就是beh kā伊「扭轉過來,tio̍h用鉤子鉤tòa」伊ê「腮」,hō͘歌革聽從上帝ê命令。

Tùi chit節mā thang看出歌革所率領ê軍隊是訓練有素、裝備齊全,因為伊ê「軍隊有真chē戰馬kah制服整齊ê騎兵」,而且「每一個士兵lóng配備tio̍h盾牌kah劍」。M̄-nā án-ne,伊ê軍隊iáu有bē少是外籍傭兵,包括有tùi「波斯」、「古實」、「弗」等地,而且武器ê配備lóng真齊全。

第6到7節,除了第5節所提起ê外籍兵團以外,chit節提起iáu有koh khah chē ê聯盟軍隊,包括有tùi「歌篾kah北方ê陀迦瑪來ê軍隊」,iáu有tùi「其它各國來ê軍隊」,歌革所率領的確實是一支勢力非常強大ê聯軍。

第8到9節,chit兩節講tio̍h無論是甚麼人teh帶領軍隊,背後lóng有上帝ê旨意。Chia講「koh過幾年」,表示以後會發生ê事。上帝beh命令歌革去「征服一個國家」,而這國家真清楚就是以色列。為甚麼會án-ne?chia並無說明。M̄-koh有一個可能是teh說明歌革率領軍隊去攻打正teh過回鄉有安定生活ê以色列人民。

重新查詢 專卷研經 以西結書系列
錯誤回報,請聯繫