以西結書 38章10節 到 38章17節   背景資料  上一筆  下一筆
Tī chit段經文中,主要teh描述歌革一直計畫tio̍h beh侵犯以色列,掠奪in所有ê一切,就ná同凶猛ê野獸攻擊被牠看中ê獵物仝款。M̄-koh聖經作者teh表達一個思想:每件事ê背後,lóng有上帝ê旨意。若m̄是,歌革mā bē想beh趁機會洗劫以色列人民。M̄-koh,上帝卻tio̍h用歌革洗劫以色列人民ê行動,hō͘歌革知影是神聖ê上帝teh主導chit件事。這ná親像俗語所講ê:謀事在人,成事在天。

第10到12節,chit段經文說明時間一到,上帝就會hō͘歌革「心生陰謀詭計」,想tio̍h beh侵略hiah-ê iáu未á是根本就無「設防ê城鎮」,因為chiah-ê城鎮ê居民認為有上帝teh看顧保守in,因為án-ne,in khiā起ê城鎮無需要建造城牆(參考撒迦利亞書二:4—5)。M̄-koh mā因為án-ne hō͘ in真容易成做外族人眼中ê獵物。M̄-koh上帝beh先知以西結清楚指出歌革心中所想ê,就是想beh洗劫以色列人民khiā起ê城鎮,因為以色列人民「擁有真chē cheng-seⁿ kah財物」。

第13節,chia ê「示巴」,是teh指現今阿拉伯半島西南ê葉門。「底但」,這是tī以東南部ê所在。「伊施」,這是今á日ê西班牙。「各城鎮ê商人」,表示chiah-ê lóng是有財力ê人,mā thang表示領袖。Chiah-ê人lóng tī問歌革一個問題:伊是m̄是真正想beh「奪行洗劫」chit-ê城鎮ê一切財物?這看起來kah-ná in tī關心chit件事,其實mā對,in關心ê是想beh趁機會分一杯羹,卻m̄是beh阻止歌革ê惡質行踏。

第14節,「趁我子民teh過安逸生活」,這是上帝保守看顧chiah有ê福氣。M̄-koh歌革beh出發去攻擊上帝ê子民以色列,上帝是真清楚ê,因為án-ne,上帝差先知以西結去刺激伊緊去,趁以色列人民都無城牆做防備ê時chūn進攻。

第15到16節,這是由真chē盟國聯合組成ê軍隊,軍伍看起來非常壯觀,是「龐(pâng)大,koh精銳ê騎兵隊」,而且兵丁ê chē就「向烏雲罩tiâu全境」,明明是就是看bē清楚,m̄-koh hō͘人看了就會膽戰心驚,心生驚惶。作者tī chia表示上帝允准歌革率領軍隊進攻以色列,用chit種方式來說明kui個行動ê主權是tī上帝ê引chhōa之下。

第17節,chia講歌革就是上帝「以前預告teh beh來臨ê hit個人」。M̄-koh tio̍h注意ê是:tī先知以西結chìn前,並無出現歌革帶領軍隊攻擊以色列ê記事。因為án-ne,這是用歌革來代表巴比倫帝國ê皇帝。

重新查詢 專卷研經 以西結書系列
錯誤回報,請聯繫