Chit章是繼續tùi第廿九章開始ê談起有關上帝beh懲罰埃及之記事。Tī這章中提起兩個時間，一是第1節，二是第17節。Á tī chit兩段時間lóng是耶路撒冷淪陷後ê時間，表示猶大亡國à。

Chit段經文koh一pái tńg來到了第廿九章3到5節所提起尼羅河kah河裡ê怪物。Beh表明ê就是：埃及就是尼羅河中ê hit隻怪物，上帝beh用siōng嚴厲ê方式來處置chit隻河中ê怪物。

第1節，上帝hō͘先知以西結ê信息，時間是tī「流亡ê第十二年十二月初一」，這是主前585年3月3日。

第2節，上帝beh先知以西結去「警告埃及王」，並為埃及王「作輓歌」，表示上帝懲罰埃及王ê時間到à。Chia講埃及王家己認為是「少壯獅」，表到真勇猛、威嚴，m̄-koh tī上帝眼中，埃及王只不過親像一個「河裡ê鱷魚」，siōng chē是「tī河裡潑水，用腳攪混河裡ê土，hō͘河水污濁」，kan-taⁿ會用chit種混水摸魚ê方式，躲bih起來藏tī人看bē-tio̍h ê所在，做kóa bē看kháu得ê事。M̄-koh即使是án-ne，上帝á是真清楚知影伊teh chhòng甚麼。

Chia所用ê句話mā另外有一種意思，指埃及ê外交政策，時常攪亂了kui個中東國際社會ê秩序。Á是講它真會使弄別人去做不應該ê事，而bih tī暗處thèng候收成。

第3到8節，chit段經文描述上帝懲罰埃及ê手段：

一是「當真chē國家ê人民聚集ê時chūn」，上主「會拋網掠tiâu」它，hō͘它無法度逃脫。

二是kā它「拖到岸上」，棄saktī土腳，「hiat tī荒野，叫所有空中ê飛鳥旱地上ê行獸來食」牠。

三是牠ê「屍體」kā遍滿kui個「山嶺」、「溪谷」，而所流ê「血」差不多ē-sái講是血流成河一般，預言死傷會真嚴重。

四是當上帝懲罰埃及時，天象會改變，ná親像當年摩西帶領以色列人民行出埃及chìn前所發生ê災難仝款（參考出埃及記十：13—15、21—23）。

第9到10節，chit兩節lóng teh強調上帝嚴厲懲罰埃及時，ē-sái真chē埃及「m̄-bat聽過ê國家」，以及「群王會驚惶pi̍h-pi̍h-chhoah」，表示列國lóng會因為巴比倫軍隊ê凶猛、殘暴之武力摧毀了埃及而驚kah gāng去到無法度khiā穩，全身pi̍h-pi̍h-chhoah，擔心「性命」不保。因為擔心會受tio̍h牽連，心中驚惶不安。

第11到16節，chit段經文真清楚hō͘埃及王知影，伊會「遭遇巴比倫王ê刀劍」殺害。有真chē「凶狠ê國家」會跟tòe巴比倫帝國ê軍隊聯合起來，用真殘酷ê手路「刣了了」埃及ê人民，án-ne，伊kah伊ê人民過去「所誇耀ê一切」全部lóng會跟tòe「消滅」。

Tī前面所提起ê，過去埃及王就是tī尼羅河裡hō͘河水混濁，藉以殺害過河ê人kah cheng-seⁿ。Taⁿ當埃及國王kah伊ê人民lóng被消滅殆盡ê時，孕育性命ê尼羅河就ē-tàng恢復以往ê「清澈」，無koh「污濁」了，而孕育性命ê契機會重新啟開。因為án-ne，字面上看起來是殘酷，其實mā是上帝特別ê恩典，會有新性命ê開始。上帝beh「hō͘埃及成做廢墟荒地」。這mā是上帝beh先知以西結寫ê「輓歌」，用來「哀悼埃及kah伊ê國民」，m̄-nā án-ne，chit首輓歌會成做「列國ê婦女lóng tio̍h唱」ê輓歌，mā會流傳落去，成做一首警戒世人ê哀歌。