以西結書 29章1節 到 29章21節   背景資料  上一筆  下一筆
Tùi第廿九開始直到到三十二章,chit段lóng是論到埃及ê問題。Tī chit段長到四章ê經文中,除了第三十章1到19節無標明日期外,其餘ê段落lóng有明確ê日期(參考廿九:1、17、三十:20、三十一:1、三十:1、17)。就án-ne ē-tàng看出,先知以西結就是beh hō͘讀者知影伊所論到ê事lóng是事實。

先知真清楚ê說明:以色列民族既然是上帝ê選民,因為án-ne,無論tú-tio̍h jōa大ê危險,siōng重要ê,就是beh óa靠上帝ê帶領,卻m̄是óa靠強權ê勢力。Koh講,上帝siōng m̄准ê一件事,就是當人á是國家得tio̍h氣力ê時,就kā家己神化了,認為家己ē-tàng kah上帝相比,甚至想beh對抗上帝,chit種心態kah念頭kan-taⁿ會帶來上帝嚴厲ê懲罰。Chit章經文就真清楚講tio̍h上帝為甚麼beh嚴厲懲罰埃及國王kah伊ê人民,原因是in像泰爾國王仝款,自比為神而且自認ē-tàng掌控上帝所創造ê尼羅河。Chit種態度就是kā上帝所創造ê萬物,當做家己ê私人財產仝款,koh khah嚴重ê是iáu kā家己神化,這是上帝所討厭ê行為。因為án-ne,上帝用巴比倫來懲罰埃及。

第1節,時間是猶大人民流亡ê「第十年十月十二日」,chit-ê日期就tī主前587年正月,是tī第廿四章1節所記載耶路撒冷被巴比倫帝國圍困ê一年後。

第2到3節,chit兩節連續用了三pái「責備埃及」,表示上帝非常受氣一定會嚴厲懲罰埃及。上帝beh成做埃及王以及伊ê人民ê「對敵」者,表示上帝beh懲罰ê對象。原因是因為伊太驕傲了,竟然講埃及ê「尼羅河」是伊「造ê」,是伊ê。伊根本無kā上帝khǹg tī眼內,卻是kā家己當做神仝款,這ná親像泰爾自稱做「神」(參考以西結書廿八:2)仝款狂妄。

Chia用「潛伏tī河裡ê大鱷魚」來形容埃及王,chit句話有兩個意思,一是in óa靠這河域過生活,二是in不時攻擊靠近河邊ê動物。

第4到5節,因為埃及王自喻是河中ê大鱷魚,因為án-ne,上帝就beh用「鉤子」來鉤牠ê鰓。「鰓」被鉤tòa,表示chit隻大鱷魚已經被掠tiâu,走不掉。上帝mā tio̍h kā「貼tiâu tòa」tī chit隻大鱷魚「鱗甲」上ê「魚mā同齊khiú出來」,chiah-ê貼tiâu tī鱗甲上ê魚,指ê就是埃及ê附庸國家á是族群。Án-ne,受懲罰ê m̄-nā是埃及,mā包含其附近óa靠它耀武揚威ê小國、族群。然後kā它「hiat-ka̍k tī曠野」、「橫屍荒地,無人收埋」,這表示境遇真悽慘,kan-taⁿ會淪落成做野獸ê食物。因為上帝beh用它ê「屍體來餵飛鳥行獸」。

第6到7節,只有tī chiah-ni̍h嚴厲之懲罰下,埃及國王kah人民chiah會醒悟過來,原來in ê君王並m̄是神,尼羅河mā m̄是神,m̄是in賴以生存ê氣力。Chit時chūn,以色列民族chiah會明白in所óa靠ê埃及,只不過ná親像「一條脆弱ê柺á」,m̄-nā無作用,靠近伊iáu會受傷害,這lóng是teh說明埃及根本就是靠不住ê一個國家。

第8到9節,chit兩節講出了上帝ê懲罰確實真嚴厲。原因是第9節所講ê,埃及國王驕傲地自稱是創造者,自認為尼羅河是伊「造ê」。

第10到12節,chit段經文繼續講tio̍h上帝對埃及ê懲罰。上帝m̄-nā tio̍h kah埃及國王「做對」,mā tio̍h kah尼羅河「做對」,後者表示上帝bē koh再hō͘尼羅河有水thang飲用kah灌溉,kui個埃及地「全部荒蕪廢棄」,無任何人kah動物會khiā起其中。

第13到15節,經過「四十年後」,上帝beh重新帶領埃及人tńg來故鄉,m̄-koh kan-taⁿ有「南部」ē-tàng khiā起而已,無koh像過去hit種強壯,in只有ē-tàng「組成一個小國」,而且是「世界上siōng小ê王國」,因為án-ne,in無法度koh再「統治別ê國家」,chit點kah上帝應允hō͘以色列人民ê cheng差真大(參考以西結書廿八:25—26)。

第16節,「以色列絕無koh óa靠in」,表示以色列人民因為看見埃及受tio̍h嚴厲懲罰而醒悟過來,知影「óa靠人是jōa-ni̍h-á ê錯誤」,而且清楚知影創造萬物ê上帝chiah是「至koân ê上主」。

第17節,「流亡ê第廿七年正月初一」,這是主前571年4月26日。

第18節,「巴比倫王尼布甲尼撒攻打泰爾」,這表示巴比倫軍隊bat猛攻泰爾,這是tùi主前587年開始攻打,直到574年,長到13年時間,因為泰爾ê防守真堅固,巴比倫軍隊ê攻擊無想像中ê順利,致使巴比倫軍隊則嚴重損兵折kā。Chia用「軍隊背負重荷,soah致使頭禿肩破」來形容巴比倫軍隊因為久攻不下泰爾ê倦tah-tah狀態。

「ē-sái講是王kah軍隊都無得tio̍h報酬」,chit句話表示經過十三年ê攻打,了後雖然成功,m̄-koh ē-tàng掠奪得tio̍h ê物件,卻khah輸這十三年所付出ê戰爭經費。

第19到20節,chit兩節thang看出巴比倫軍隊看tio̍h攻打泰爾得不償失了後,決定轉向攻打埃及,án-ne巴比倫國王就ē-tàng用phah敗埃及所得tio̍h ê「戰利品」,來做補償攻打泰爾損失ê「軍餉」。

第21節,「hit時」,表示上帝審判ê時刻。上帝beh koh一pái賜福以色列,這表示懲罰埃及是對以色列有利。上帝beh hō͘全體以色列人民注意聽先知以西結傳講ê信息。

重新查詢 專卷研經 以西結書系列
錯誤回報,請聯繫