Tùi chit章開始直到第廿八章19節，chit段經文lóng是teh指tio̍h泰爾chit-ê城市kah族群ê問題。泰爾，古早時腓尼基，mā就是今á日ê黎巴嫩ê首都，是一個海岸城市，因有絕佳ê地理位置，因為án-ne，tī商業kah政治上，一直是列強覬覦爭奪ê城市。Chit-ê城市自古以來就kah以色列人民有密切ê商業來往。

主前595到594年間，泰爾bat kah猶大簽訂聯合公約beh共同對抗巴比倫帝國（參考耶利米書廿七：3），m̄-koh tī猶大受tio̍h巴比倫攻擊ê時，泰爾卻因為看見ê時勢不利，而無照約束出兵協防猶大，結果反tńg hō͘家己成做孤立ê城市，終其尾受tio̍h巴比倫帝國嚴厲ê打擊。

Tùi第廿六到廿八章19節ê chit段經文中，thang用「上主對我講話」chit句話當做區分段落（參考廿六：1、廿七：1、廿八：1、11、20），然後每一個段落ê主題：一、第廿六章1到21節，論到泰爾城ê毀滅；二、第廿七章1到36節，講tio̍h泰爾船隊ê沒落kah遭遇；三、第廿八章1到10節，泰爾王kā受tio̍h懲罰；四、第廿八章11到19節，用泰爾王ê遭遇警戒其他國家。

Chit章真詳細地敘述巴比倫軍隊會帶hō͘泰爾kah居民極大ê摧殘kah傷害，其中iáu包含一首哀歌，是為tio̍h beh哀悼泰爾ê毀滅。

第1到2節，「流亡ê第十一年某月初一」，tùi第2節知影是「耶路撒冷毀了」ê日子，因為án-ne，thang換算出是tī主前586年二月12日á是13日，mā就是耶路撒冷淪陷ê日子。

「泰爾城ê居民興高采烈」，in看見「耶路撒冷毀了」而出現chit種反應，原因是in只tùi經濟利益著（tio̍k）眼，認為耶路撒冷chit-ê貿易對手，現在無能力kah in競爭à。

第3到6節，上帝決定beh「對敵」泰爾，這「對敵」一詞tī先知以西結ê作品中用真chē pái，表示上帝ê審判kah懲罰ê意思。上帝懲罰ê方式就是召集列國ná親像「波濤湧來」般ê攻擊泰爾，hō͘泰爾完全無法度承受，結果被「掃除所有ê土粉」，呈現出來ê是「光溜溜ê石頭」，到最後泰爾最後只chhun「孤島」，無土地thang種作，只有ē-tàng tī「孤島」上靠掠魚為生。即使án-ne，mā bē-tàng安寧，因為列國會來「洗劫」它，mā tio̍h「用劍刺刣週圍城鎮ê居民」。

Chit句「周圍城鎮ê居民」，原本希伯來文是teh指「田裡ê眾女」，意思是teh指tī田園裡工作ê婦女mā難佳哉免得，lóng kā遇tio̍h殺害。這mā表示被殺害ê人非常chē，差不多是全被刣滅ê慘況。另外一方面，chit句「周圍城鎮ê居民」，mā是teh表示泰爾ê「衛星城市」，是óa靠泰爾經濟發展而生存ê城鎮ê意思。

第7到8節，「世界siōng大ê國王—巴比倫ê尼布甲尼撒王」，這是kan-taⁿ有ê一pái用「世界siōng大ê國王」chit種句型形容巴比倫帝國皇帝尼布甲尼撒。Mā tùi chit句話看出當時ê巴比倫帝國已經是siōng大、siōng強壯ê帝國。Chia講「軍馬、戰車、騎兵」等名詞，chiah-ê lóng kah「馬」有關係，這teh表示：巴比倫軍隊已經kā siōng重要ê軍事裝備lóng派出，非常齊全。巴比倫帝國已經先the̍h落來了泰爾ê「周圍城鎮」，而且chiah-ê城鎮ê居民lóng遇tio̍h「殺害」。然後in「挖壕溝，築土堆，排列盾牌」等，準備ài進攻泰爾。

第9到14節，「破城ê槌」，這是kā整棵樹ê主幹phut落來當做撞城ê武器。是kā樹幹ê一頭削成尖頭狀，包上厚ê鐵片，kā chit種樹幹khǹg tī推車上，用快速方式推撞城門。Á「鐵棒拆毀堡壘」，chit種鐵棒帶有銳利ê彎勾，m̄-nā thang用來拆毀城牆，mā thang用來攻擊守衛ê軍兵。來進攻泰爾城ê巴比倫軍隊ê陣容非常堅強，m̄-nā是軍兵人數真chē，單單軍兵喊叫kah戰馬ê嘶厲聲，就夠額「震撼了城牆」，其攻擊力非常堅強，明明是無法度抵擋。In tī「大街小巷橫衝直撞」，如入無人ê地一般四界「用劍刺刣居民」，連泰爾ê守護神之「廟柱會被sak倒tī地上」，所有商家kah私人財物lóng kā hông掠奪、洗劫一空。Kui個泰爾城以後be7 koh聽tio̍h「歌聲」、「豎琴ê樂聲」，過去歌舞昇平ê日子，現在lóng「停止」了，因為國家戰敗了，人民死傷慘重，受掠為奴ê人koh khah chē。只chhun討海人tī「光溜溜ê石頭」曝漁網而已。因為毀壞情況嚴重到「無法度重建」，表示已經是徹底毀滅。

第15節，thang參考以賽亞書第廿三章1節，描述hit-ê城tú-tio̍h ê慘狀是連航行tī海上ê船夫，lóng thang聽見遠tùi城裡居民被「屠殺」ê時所發出ê「尖叫」聲音。

第16節，巴比倫軍隊ê殘酷手段，m̄-nā是泰爾城受tio̍h非常慘重ê結果，連散落在地中海ê附近真chē島嶼、城邦ê國王，聽見了mā lóng膽戰心驚地主動「脫掉王袍kah刺繡ê衫褲」，全身「pi̍h-pi̍h-chhoah」到無法度khiā立，只有ē-tàng「坐tī土腳」m̄知如何是好。

第17到18節，是一首哀歌。真清楚談起過去ê泰爾，bat有過非常強盛、風光ê時刻，m̄-koh in lóng bat因為án-ne而仗勢欺人，「恐嚇沿海ê居民」，taⁿ變成in hō͘人欺壓、恐嚇。Taⁿ當它受tio̍h巴比倫帝國ê摧殘ê時，其他koh khah弱小ê「島嶼」邦國聽tio̍h巴比倫帝國án-ne殘酷手段teh摧毀泰爾ê時，lóng會「顫抖」、「驚惶」不安。

第19到21節，lóng teh說明泰爾kā成做廢墟，無人khiā起ê所在，就kah-ná被「深淵大洋ê水淹滅」，表示完全無恢復性命ê希望。Ná親像被推到「陰間」、「深淵」一般，只有「死人」chiah會去khiā起ê所在。而且kā永遠無koh重現。