以西結書 25章1節 到 25章17節   背景資料  上一筆  下一筆
Tùi第廿五章開始直到第三十二章,是一個新ê段落。Tī chit段落中,lóng是論到有關上帝審判圍tī以色列人民四周ê國家、民族,包括有亞捫、摩押、以東、非利士、泰爾、西頓,kah埃及等。Tī chit段經文中,有幾個特色,一是用「至koân ê上主講」詞句,二是lóng會先說明上帝為甚麼審判chiah-ê國家á是族群,三是論述上帝ài怎樣懲罰,四是以「án-ne,lín就會知影我是上主」chit句話做結尾。

Chit章論到了四個族群,包括第1到7節ê亞捫;第8到11節ê摩押;第12到14節ê以東,kah第15到17節ê非利士等。

第1到2節,「beh責備亞捫人」,chit-ê族群是現在約旦王國ê一部分, tī猶大東邊ê隔壁。早tī士師ê時代,就是hō͘以色列人民siōng感頭殼痛ê族群之一(參考士師記十:7—9、十一:4)。一直到主前597年,亞捫人藉tio̍h巴比倫帝國入侵耶路撒冷ê機會,趁火來phah劫(參考列王記下廿四:2),而且tī背後策劃殺害巴比倫帝國任命ê總督基大利(參考耶利米書四十:13—四十一:18)。

第3節,指出亞捫人看見猶大遇tio̍h洗劫,聖殿被毀ê時,卻tī邊á拍手、跺腳,而且用正khau倒削ê話語譏笑以色列人民。

第4到5節,因為in幸災樂禍ê行為,上帝beh hō͘「東邊曠野來ê部族」,入侵tī in ê「土地頂面紮營、定居」,而且beh「食lín ê土產,lim lín ê奶」,chit句話真清楚teh表示亞捫一定tio̍h按時向佔領in ê統治者進貢。In ê首都「拉巴城」,會荒廢成做「放牧駱駝ê所在」,甚至嚴重到kui個國家「成做羊群倒ê牧場」,這表示城內ê人民大多數被刣死,á是人民hông擄去販賣為奴,城內無koh有人khiā起。

第6到7節,上帝beh án-ne嚴厲懲罰亞捫人,是因為in用幸災樂禍ê心態teh看待以色列人民ê境遇,連一點點á同情心mā無。上帝ê懲罰就是hō͘ in成做外國人侵犯ê對象,ná親像以色列民族所遇tio̍h ê情景仝款。

第8節,提起「摩押」國,in tī亞捫ê南邊隔壁,死海以東ê所在,南邊kah以東相連,東邊是阿拉伯大沙漠。

「摩押講猶大國kah別ê國家lóng無差別」,chit句話表示tī摩押人ê眼中,認為上帝ê選民mā無甚麼了不起,這等於是藐視上帝,看bē起上帝仝款。

第9節,「摩押邊界ê城鎮」,chia特別提起「伯‧耶西末、巴力‧免、基列亭」等三個主要「城堡」,是設tī死海ê東邊,亞嫩河ê北部,lóng會因為hō͘上帝懲罰,chiah-ê城鎮會受tio̍h巴比倫軍隊ê「攻擊」,這mā表示摩押會失去邊界屏障。

第10到11節,上帝一定「beh懲罰摩押」,有tùi「東邊曠野來ê部族」會征服「摩押,連亞捫同齊征服」。結果摩押kah亞捫lóng tī chit兩族ê併吞之下,「被列國遺忘」消失。

第12節,開始提起「以東人」ê問題。上帝講「以東人凶狠地向猶大報復」,chia所指ê「報復」,是teh指耶路撒冷城遇tio̍h摧毀ê時chūn,以東人khiā tī巴比倫人hit邊,協同殘害以色列人民(參考俄巴底亞書第12—14節,詩篇一三七:7—9),in chit種惡質ê行踏hō͘上帝認為是「罪惡滔天」般ê嚴重。因為上帝無歡喜人有chit種趁火phah劫、落井下石ê心態á是行為。

第13節,提起上帝決定beh「懲罰以東」,tùi「提幔到底但ê土地lóng tio̍h荒廢」,意思是teh指kui個以東人khiā起ê地區,「lóng tio̍h荒廢;所有ê人lóng被殺害」,這是真嚴重ê懲罰。

第14節,指出以色列人民會執行chit項「向以東報復」ê命令,chit句話已經teh暗示上帝會koh再復興以色列民族。

第15到17節,開始提起有關非利士人ê問題。Chia講非利士人ê「世仇」,就是teh指以色列人民。為tio̍h beh報復,in「tī仇恨下殺戮了敵人」,表示in殺害以色列人民真chē。因為án-ne,上帝ài beh進行懲罰,方式真清楚,就是beh「消滅」chit-ê族群。甚至「連殘留tī非利士平原ê人」,上帝mā lóng m̄ hō͘ in有機會存活落來,因為上帝beh「重重地」、「piàⁿ落大受氣」懲罰in,ná親像in用殘酷手段相對待已經落難ê猶大人民仝款。

重新查詢 專卷研經 以西結書系列
錯誤回報,請聯繫