以西結書 23章22節 到 23章35節   背景資料  上一筆  下一筆
Tī chit段經文中有四pái lóng是用「至koân ê上主án-ne講」(參考第22、28、32、35節等等)做踏話頭,mā說明這是四個分段,說明猶大(用「阿荷利巴」一詞表示)án怎得罪上帝,卻m̄知反省、悔改認罪。因為án-ne,上帝表明ài怎樣嚴厲懲罰這悖逆ê子民以色列。

第22節,chia「至koân ê上主」,chit-ê詞至少表明三種意義:一是teh指創造宇宙萬物ê主宰;二是teh指獨一、無法度用其它神來比並ê真神;三是teh指神聖bē-tàng侵犯。

Chia指出猶大tī心態上ê錯誤,就是喜新厭舊ê感情。用tī對上帝ê信仰上,就是對上帝無「全心、全情、全力」ê疼,因為án-ne,上帝beh激起chiah-ê過去kah猶大有外交關係聯盟ê國家受氣、忿怒,hō͘ chiah-ê國家「來圍攻」猶大。

第23到24節,講出準備出兵來攻擊猶大ê,包括有「巴比倫人kah迦勒底人」,這其實lóng是仝款ê人。同時iáu有「比割人、書亞人、哥亞人,kah所有ê亞述人來」,這表示所有ê族群lóng kā趁此機會圍攻南國猶大,hō͘它無法度逃脫上帝ê懲罰。Chiah-ê來圍攻ê族群、國家lóng配備tio̍h「戰車kah輜重車」,in ê軍隊裝備齊全,lóng有「盾牌頭盔護身」。而且chiah-ê國家、族群會「照in ê律法審判」,表示chiah-ê來攻擊猶大ê族群,bē帶有憐憫,卻是會用非常粗暴ê手段來對待in。

第25到27節,講出巴比倫帝國軍隊使用殘酷ê手段對付猶大,in會「割掉」猶大以色列人民「鼻á kah耳á」,並且mā會「刣死」kah「俘虜」in ê kiáⁿ,甚至是「活活燒死」,chiah-ê teh說明人類戰爭史上常見ê殘酷手段,m̄-nā過去án-ne,即使tī今á日mā是仝款。

「剝掉你ê衫褲,搶去你ê珠寶」,chit節thang參考第十六章39節。前者是一種侮辱ê方式,後者講出過去因為犯罪所累積存起來ê珍貴物件,lóng會hō͘洗劫一空。換句話講,過去用chiah-ê珠寶顯示貴族氣派ê,taⁿ lóng會成做被侮辱ê對象。只有tī chiah-ni̍h殘酷ê懲罰下,猶大人民chiah會醒悟過來而「無koh留戀埃及」。

第28到31節,仝款是用「至koân ê上主án-ne講」開始,chit段經文mā說明巴比倫帝國ê軍人會án怎地殘酷對待以色列人民,就是極盡所ē-tàng地侮辱in,hō͘ in ná親像「妓女」仝款,任人sńg弄、嘲(sau)笑、輕視。猶大ná親像「娼妓」仝款,m̄-nā只有ē-tàng供眾人sńg弄,iáu tio̍h去學習怎樣崇拜chiah-ê結盟宗主國ê偶像神明。因為in學習北國以色列(指「阿荷拉」,參考廿三:4)ê腳跡。因為án-ne,上帝怎樣懲罰北國以色列,mā tio̍h用仝款ê方式懲罰猶大。

Chia用「懲罰」ê「杯」來表示上帝ê懲罰。Tī聖經中不時被用懲罰ê杯來做譬喻(參考詩篇七十五:8,以賽亞書五十一:17、22,耶利米書廿五:15—29、四十九:12,俄巴底亞書第16節,哈巴谷書二:16)。

第32節,tùi chit節到第34節,是一首詩歌,mā是用「至koân ê上主án-ne講」開始,mā用chit句話做結語。

Chia繼續第31節所提起ê「酒杯」,強調這杯是「koh深koh大」,表示甚麼人lim了這杯,必定會醉茫茫。這杯「貯滿懲罰」,這是teh指上帝ê大受氣所帶來ê結果。

第33節,講第32節ê酒杯所帶來ê結果是「hō͘人恐怖、淒涼」、「醉倒、悲慘」,chiah-ê lóng tī指國家將會滅亡ê意思。

第34節,「lim盡這杯,連渣滓mā吞落去」,chit句話真清楚teh說明:南國猶大所有ê人民,無任何一個人ē-tàng逃得過chit pái國家被滅亡所帶來ê慘劇。

「碎片會割破你ê乳房」,有ê版本用「拔出你ê頭毛」,chit種句話lóng teh表明非常痛苦ê意思。

第35節,是chit段經文ê最後結語,用「至koân ê上主án-ne講」做總結。並且講出kui個懲罰ê原因:就是「bē記得」、「棄sak」了上帝。

重新查詢 專卷研經 以西結書系列
錯誤回報,請聯繫