以西結書 23章1節 到 23章21節   背景資料  上一筆  下一筆
第廿三章是第十六章了後,koh一pái用淫婦、娼妓等字詞來描寫以色列民族。所講ê兩姊妹,就是teh指北國ê以色列kah南國ê猶大。先知以西結用「阿荷拉」來代表北國以色列ê首都撒馬利亞,用「阿荷利巴」代表南國猶大首都耶路撒冷。

Chit段經文詳細描述以色列民族án怎違背kah上帝之間ê夫妻之約ê關係,用來比並以色列民族kah其它同盟國家間互動ê情景。

第1節,「有一對姊妹」,指ê就是兩個城市(á是國家)ê意思。

第2到4節,「tòa tī埃及」,這是teh指以色列民族bat tī埃及做過奴隸ê意思。Chia用「妓女」teh代表以色列民族已經淪落到成做性工作者,任人sńg弄。表示以色列民族過去tī埃及做奴隸,就是埃及人ê sńg物,因為奴隸是無自主權,而且是主人ê「財產」,一定tio̍h服從主人ê命令做tāi-chì,隨在主人pái佈。

Chia講「阿荷拉—代表撒馬利亞」,chit-ê名字意思是teh指「伊ê帳幕」,這koh說明上帝已經無koh kah in同在à。「阿荷利巴—代表耶路撒冷」,tú好講出上帝tī以色列人民中間,因為án-ne,mā代表耶路撒冷聖殿ê意思。

「我娶了in姊妹兩人」,表示上帝kah南北兩國ê以色列人民lóng有立約,chit-ê約是ná親像夫妻一般。而且in「替我生了gín-á」,表示有真正夫妻之實。

第5節,就明顯Kā chit種夫妻間ê婚約關係,引伸到政治盟約ê境況,就是kah上帝(丈夫)ê關係已經薄弱,卻強化kah亞述(情郎)ê關係親密。因為án-ne chia用「結婚後猶原做妓女」,形容對上帝無忠實ê意思。

第6到7節,chit兩節講出亞述當時ê軍隊非常帥氣挺拔,hō͘人看見就會心生迷戀之情,包括「穿紫色制服ê軍人、貴族kah高級軍官」,而且是看起來ta̍k個lóng「少年iân-tâu」,結果北國以色列人民迷戀到傾心甘願「做in ê情婦」,這mā表示並無實質ê婚約關係,只不過是hō͘ sńg弄ê對象。

第8節,chit節thang參考第二十章5到8節,thang明確看出北國以色列原本kah亞述立約,後來soah koh想beh背叛亞述,去chhōe埃及幫忙,chit種tī政治上對盟約ê無忠實,to̍h是in對上帝無忠實ê寫照。用chit種方式形容北國以色列人民ná親像「妓女」仝款,歡喜「操淫業」過生活。

第9到10節,這是上帝對北國以色列ê懲罰,kui氣就kā北國以色列交hō͘「亞述情郎」,而這是發生tī主前721年(參考列王記下十七:5—12)。亞述極盡所ē-tàng地侮辱in,「Kā伊剝光」衫褲,同時「掠tiâu伊ê cha-bó͘-kiáⁿ」,kā in lóng俘虜去做奴隸(參考列王記下十七:6)。

第11到13節,「小妹阿荷利巴」,是teh指南國猶大ê意思。Chia指出猶大並無tùi北國以色列人民ê慘痛境遇來學習反省,反卻是「koh khah墮落,koh khah淫蕩」,結果仝款,「伊被玷污了,伊kah伊阿姊仝款淫蕩」。這lóng teh說明猶大去chhōe亞述ê協助,in lóng忘記tī tú-tio̍h困境ê時chūn,chhōe kah in立有性命之約ê上帝,卻是去chhōe政治上ê伙伴。

第14到15節,頭前談及亞述,現在開始談起巴比倫帝國。當南國猶大看tio̍h巴比倫漸漸興盛起來,就koh轉向巴比倫帝國靠lóng。Chia用「鮮紅ê顏料」之畫像,表明巴比倫帝國ê興起,比起漸漸老邁ê亞述koh khah引人注目。而且chiah-ê高級軍官是「腰間lóng繫tio̍h腰帶,頭殼頂帶著有垂飾ê禮帽」,chiah-ê用詞lóng teh表示裝扮得非常亮眼,hō͘人看了lóng會產生迷戀之心。

第16到17節,chia講出猶大國開始想beh kah巴比倫帝國進行外交盟約關係。M̄-koh結果境遇仝款,ná親像北國被亞述蹂躪仝款,南國猶大遇tio̍h巴比倫帝國ê摧殘情況仝款。

第18節,「伊tī大眾面前thǹg-pak-theh,hō͘大家lóng知影伊是娼妓」,這是真大ê侮辱。Chia ê「大眾」、「大家」所指ê除了巴比倫帝國之外,iáu有真chē國家mā參與掠奪耶路撒冷有分(參考列王記下廿四:2),大家lóng tī笑南國猶大ê懦弱、不堪一擊。

第19到21節,清楚講tio̍h南國猶大iáu-koh相信埃及是in ê siōng愛(參考耶利米書三十七:5)。In m̄知上帝已經揀選巴比倫帝國當僕人,beh來懲罰猶大(參考耶利米書廿五:8—9)。

重新查詢 專卷研經 以西結書系列
錯誤回報,請聯繫