以西結書 21章18節 到 21章32節   背景資料  上一筆  下一筆
Chit段經文特別提起巴比倫王就是上帝用來懲罰猶大國ê刀kah劍。巴比倫王用搖箭占卜ê方式,tī耶路撒冷,á是亞捫ê 拉巴城兩大城中選取一條,結果決定進攻耶路撒冷。先知以西結mā指出猶大人民siōng大ê錯誤,就是m̄相信上帝ê僕人所傳達tùi上帝來ê「預言」,in只相信政治手段ē-tàng拯救in ê性命免tī危機,m̄-koh這是錯誤ê想法。

第18到19節,chia ê「巴比倫王」是teh指尼布甲尼撒;伊用強大ê軍事武力進攻大ê耶路撒冷。

第20到22節,tī第19節中ê兩條路線中,其中一條是「指向亞捫ê 拉巴城」,「拉巴城」是亞捫ê首都(參考耶利米書四十九:2),另外一條是「指向猶大,通往有鞏固防衛ê耶路撒冷城」。

Chia提供古代君王á是祭司(巫師)用三種方式詢問上天ê旨意:一是「用搖箭占卜」。二是「求問伊ê偶像」。三是「查看祭牲ê肝」,chit種方式用土製造成動物ê肝ê樣式,畫分做幾個區塊做占卜ê路用。

因為抽出ê箭上寫「耶路撒冷」,因為án-ne,巴比倫尼布甲尼撒王就決定進攻耶路撒冷城。尼布甲尼撒準備「破城ê槌」,然後koh「築土堆,挖壕溝,喊hoah叫刣」,chiah-ê lóng是攻城一定有ê基本動作。大聲叫mā是一種威嚇城內居民kah守軍ê方式。

第23節,thang參考第十七章16節所提起ê背景。Chit節提起耶路撒冷人「bat kah巴比倫訂了條約」,就是因為西底家王bat用上帝ê chiù-chōa,表示絕對忠實tī巴比倫帝國。In並m̄相信上帝透過祂忠實僕人先知傳達ê信息。

第24節,「人人lóng知影lín罪孽深重」,表示猶大人民偶像崇拜ê熱情已經m̄是風聞而已,卻是遠近lóng知。因為án-ne,上帝一定會嚴厲「懲罰」in,kā in「交hō͘敵人」巴比倫帝國。

第25到27節,「邪惡該死ê以色列領袖」,chit句話指ê是包括君王、先知kah祭司lóng在內。現在上帝beh懲罰chiah-ê眾領袖,因為in就是帶頭犯罪ê人,上帝決定beh摘落來in ê「王冠kah禮帽」。

「無權力ê人會被提升,統治者會被sak落台」,chit句話thang參考以西結書第十七章24節,表示上帝一出手,狂傲者原本尊貴、榮耀ê一切lóng會化成烏有。

Tī chia「完了」一字連續出現三pái,表示所預言ê事一定會實現ê意思,而且會遇tio̍h毀壞而無法度修復。Tī chia是teh指耶路撒冷城koh khah án怎都保不住à。

第28到29節,「向侮辱以色列ê亞捫人講ê話」,這表示上帝m̄-nā beh懲罰猶大人民,mā beh懲罰亞捫人,仝款是「刣人ê劍已經準備好勢」,而且「劍已擦亮,像sìh-nà發光」,情景lóng kah耶路撒冷ê遭遇仝款。

第30到32節,先知以西結傳出上帝ê話,ài in「收劍入鞘」。因為上帝就是beh透過巴比倫帝國來懲罰亞捫人,就算in想beh抵抗mā是枉然。

Chia提起巴比倫王尼布甲尼撒王是一個「殘忍ê劊子手」,in會徹底消滅亞捫人ê國家、族群,hō͘後代「無人會koh再記起」in。

Tùi頂面所講經文thang看出猶大ê以色列人民,kah亞捫人所遭遇ê結果是大無相仝;前者是hông擄去做奴隸,而且集體tī奴隸集中營中過生活,in ê故鄉雖然因為án-ne而荒廢了,成做野狗盤踞ê所在(參考耶利米書十:22)。M̄-koh總有一工,in會hō͘上帝帶領tńg去故鄉重建家園。Á後者mā就是亞捫人,卻tī in家己ê家鄉被巴比倫帝國hō͘徹底打擊,iáu hō͘伊族hō͘併吞消滅。

重新查詢 專卷研經 以西結書系列
錯誤回報,請聯繫