以西結書 20章1節 到 20章32節   背景資料  上一筆  下一筆
以西結書tùi第二十章開始直到第廿四章,長到五章ê經文中,lóng是teh談有關耶路撒冷城被巴比倫軍隊攻陷ê預言。Á chit段經文ê背景應該是tī主前591年到588年所傳講ê信息。

Tī chit第二十章,先知以西結以宗教信仰ê歷史為主軸,敘述以色列民族tī信仰上失序ê情形。其實mā thang án-ne講,先知運動siōng重要ê基礎,就是tùi信仰來反省,卻m̄是考量政治、經濟ê狀況,koh khah m̄是軍事ê。Tī眾先知ê觀點中:若是無敬虔ê宗教信仰,就算有真好ê政治領導者,mā會真緊to̍h變質;若是無真堅定ê信仰做基礎,經濟發展會變成壓搾、剝削窮苦人民ê藉口;若無信仰做根基,軍事力量真可能會成做統治者濫刣無辜人民ê工具。因為án-ne,先知運動siōng重要ê一件使命,就是hō͘國家、社會、民族ê領導者,lóng ē-tàng tńg來到上帝面前,同時人民mā tio̍h以忠實ê心回應上帝揀選ê疼。

Chit段經文談及上帝怎樣愛以色列人民,m̄-nā kā in帶領出埃及ê奴役之地,而且iáu kah以色列人民立約,表示beh賞賜kā in賜福肥ê土地thang安居。M̄-koh當in離開埃及進入曠野開始流蕩ê生活了後,每pái經歷到iau餓、乾渴、瘟疫等侵襲,就一再地發出怨言,甚至認為tńg去埃及比離開koh khah好,chiah-ê lóng teh表示in已經對上帝失去信心。而且koh khah嚴重ê是,當in進入應允之地後,in ê kiáⁿ孫並無因為頂一代祖先所犯ê錯誤而知影警醒悔改,反卻是跟tòe祖先惡質ê行為去拜偶像棄sak上帝,而且chit種情形是一犯koh再犯,án-ne chiah是上帝siōng-kài忿怒ê原因。

第1到3節,「被放ta̍k ê第七年五月初十日」,這是teh指主前591年七月á是八月10日。是以約雅敬王tī主前597年受掠hit年開始計算。

Chia koh一pái提起「有kóa以色列ê長老」到先知以西結ê「面前坐落來」,in真想beh知影「上帝ê旨意」。In真可能是想beh知影,到底in ài tī巴比倫做奴隸jōa久?先知耶利米bat真清楚表示會長到「七十年」時間(參考耶利米書廿五:11—12)。不過mā有另外一種看法,認為chiah-ê長總是來詢問耶路撒冷是m̄是成(chiâⁿ)實會如先知以西結所講ê會hō͘巴比倫帝國所毀?á是講上帝ê聖殿被摧毀?因為in一直認為上帝ê聖城kah神聖ê居所無可能被敵人所毀。In án-ne問,是想beh知影到底怎樣一回事?m̄-koh當先知以西結向上帝求問啟示旨意ê時,上帝ê回答是「m̄准lín求問」,因為chiah-ê猶大人民ê眾長老過去一再拒絕聽從上帝ê僕人傳達ê信息。

第4節,上帝beh先知以西結「宣告in ê罪」,這表示上帝ê審判beh開始。這審判提起in ê祖先早已經棄sak上帝去拜偶像。

第5到7節,chit三節koh一pái提起上帝帶領以色列民族ê祖先離開埃及,並且應允kā in賜福流奶kah蜜之地,iáu kah in ê祖先立約,ài in「hiat-ka̍k in所疼ê hiah-ê thang憎恨ê偶像,bē-tàng拜埃及ê假神來玷污家己」,因為這是上帝所m̄准ê事。

第8到9節,chit節指出以色列人民真正ê問題,就是無遵行所立ê約,in「背叛」上帝,無「聽從」上帝ê旨意,而chit款tāi-chì情是in早tī埃及時就發生了,上帝原本beh hō͘ in死tī埃及,m̄-koh後來á是帶領in離開埃及,因為上帝bat用家己ê名chiù-chōa,講beh帶領in離開奴役in ê埃及。

Chit種為tio̍h維護上帝神聖ê名ê講法,tī本章第14節、第22節、第44節等等一再出現。換句話講,上帝絕對m̄准祂ê聖名tú-tio̍h到侮辱、毀謗。

第10到12節,上帝「領in出埃及,chhōa in到曠野」,chit句話真重要,因為這清楚說明以色列人民離開埃及了後,m̄是馬上就進入hit-ê應允之地,卻是先進入曠野。而且是tī曠野漂流長到四十年時間(參考申命記八:2,約書亞記五:4—6,使徒行傳七:36),而chit段tī曠野漂流期間,mā是真重要ê一段訓練功課,為tio̍h是beh hō͘ in ē-tàng脫胎換骨,成做完全óa靠上帝ê族群,而bē koh再懷念tī埃及ê富裕物質生活(參考民數記十一:4—6)。Mā同時「命令in遵守安息日」,因為會遵守安息日ê誡命,因為上帝ài in用chit種方式來表示「當做咱立約ê記號」(參考出埃及記三十一:12—13、16—17),表明in願意「成做神聖ê子民」。

第13節,chit節mā有表示一個基本信仰觀念:不遵行上帝ê律法誡命,就等於是「玷污了安息日」,原因是安息日tùi án-ne kah上帝立約ê憑據。不遵行上帝ê話,就表示無koh遵守kah上帝所立ê約,真自然tek,就bē想beh去敬拜上帝,聽上帝ê話語。上帝本來想beh「倒盡」祂ê「大受氣,消滅in」,m̄-koh上帝後來無án-ne做因為祂有憐憫kah豐富ê疼。

第14節,chit節koh一pái重複第9節所講ê。

第15到16節,因為án-ne上帝chiù-chōa「不領in」到「hit塊流奶kah蜜ê土地」,chit件事是teh指hit群tùi埃及出來,年滿二十歲以上ê人,只有二十歲以下ê人chiah ē-tàng進入,原因是in對上帝ê應允無信心,除了連連發出怨言之外,並無切實遵行上帝ê僕人ê教導,甚至是背叛上帝ê旨意(參考民數記十四:28—35,約書亞記五:4—6)。Koh講,mā因為in「玷污了安息日」,hō͘這原本神聖ê約ê記號蒙上了陰影。

第17節,上帝「可憐」以色列民族,並無tī忿怒中出手懲罰in,因為án-ne chiah無「tī曠野消滅in」。

第18到20節,m̄-koh上帝有「警告」in,當年二十歲以下ê青年,絕對bē-tàng隨從曠野民族ê「風俗」,mā bē-tàng「拜偶像來玷污家己」,tio̍h「服從」上帝ê「律法誡命,遵守安息日做神聖ê日子」,用chit種方式來表明kah上帝之間立約ê憑據。

第21節,m̄-koh「hit一代mā背叛了」上帝,m̄-koh上帝仁慈憐憫,因為iáu有一kóa遵守立約ê人所帶來ê福氣,減少了上帝ê「忿怒」,無kā in全lóng刣了了。

第22節,chit節koh一pái重複第9節、第14節等等。
第23到24節,chia已經暗示了早tī以色列人民iáu tī曠野漂流時代,上帝就有chit種準備,beh嚴厲懲罰in,hō͘ in「分散到全世界」,原因就是in lóng輕蔑上帝ê話語,對神聖ê安息日採取輕視ê態度。

第25到26節,chit兩節經文thang參考羅馬書第一章24到32節,表示上帝最後採取ê方式,就是chhut-chāi以色列人民放縱家己ê惡質行踏,包括in「獻家己ê大kiáⁿ做牲祭」,學習了當地拜偶像神明ê惡質行為(參考列王記下十六:3、十七:17、廿一:6)。Á chiah-ê行為lóng是當年摩西所嚴厲禁止ê(參考利未記十八:21,申命記十八:10)。

第27節,上帝指控以色列人民ê祖先背叛上帝,對上帝「不忠」,違背了kah上帝之間所立ê約。因為以色列人民kah上帝ê約,是ná親像夫妻ê約束ê關係,因為án-ne,對上帝「不忠」,就是對上帝ê一種極大「侮辱」。

第28到32節,chit段經文講出上帝會拒絕來詢求上帝旨意ê長老,就是因為當上帝帶領in ê祖先進入「應允kā in賜福ê土地」後,in就一再地tī「大山kah綠樹」中起祭壇拜偶像神明,iáu認為上帝看bē-tio̍h,而且tī祭壇上kā家己ê kiáⁿ當做「牲祭燒獻hō͘伊所拜ê偶像」,chit種行為差不多就是迦南地人民tī宗教信仰上ê行為,然後現在「iáu敢來求問」上帝ê「旨意」,因為án-ne,上帝tī chia真清楚回答講:「m̄准lín求問!」chit句回應了chit章第3節所講ê。

重新查詢 專卷研經 以西結書系列
錯誤回報,請聯繫