以西結書 20章45節 到 20章49節   背景資料  上一筆  下一筆
Chit段經文,tī希伯來文聖經是khǹg tī第廿一章ê篇幅中,而tī《七十人譯本》則kah《台語漢字》以及《現代中文》ê版本仝款,lóng是編輯tī第二十章ê末尾。Mā是tùi chit段經文開始直到第廿三章止,每段經文ê踏話頭lóng是用「上主對我講話」當做段落ê起點(參考二十:45、廿一:1、8、18、廿二:1、17、23、廿三:1)。

Chit段經文是上帝對先知以西結講ê話,ài伊面對南方ê樹林講話,而chit段話卻是傳達上帝ê懲罰方式,就是用火燒毀所有ê樹木,而且火勢極大,無法度用人ê能力撲滅。Chia ê「火」,真清楚是teh表明上帝ê忿怒,會燒盡人所有ê一切財物。

第45到46節,chia出現「南方」一詞,而tī第47節mā一再出現。上帝beh先知以西結對tio̍h樹林講「預言」,這mā是一種象徵性ê身軀語言。

第47節,「火會燒盡樹林內ê全部樹木」,若是這樹林表示kah黎巴嫩有關,án-ne,用chit-ê詞乃是一種隱喻ê講法,表示原本以珍貴建材建造起來ê王宮,會因上帝忿怒ê火而付諸一炬。列王記下第廿五章9節真清楚記載,當巴比倫帝國ê軍隊攻入耶路撒冷城後,就是「放火燒毀了聖殿、王宮,kah一切耶路撒冷達官貴人ê房屋」。

先知beh對樹林講話,mā tio̍h樹林「聽至koân ê上主所講ê話」,這表示樹木樹林lóng是上帝所創造ê(參考創世記一:11—12),只要上帝ê命令落來,chiah-ê上帝所創造ê樹木樹林lóng會聽從。

「tùi南方一直延燒到北方」,chit句話mā有表示全面性ê受tio̍h火燄波及,無一鄉鎮、城市thang佳哉免得,這就是chit所在所講ê「人人lóng會感覺火燄ê炙燒熱」ê意思。

第48節,chia真清楚講出是「上主放ê火」,既然án-ne,想beh用人ê氣力阻擋,he是無可能ê事,除非上帝koh下命令阻止,若無,一定會kā一切lóng燒為火灰,所以chia講「無人ē-tàng撲滅」。

第49節,先知以西結因為不時用chit種象徵性ê譬喻,m̄-nā是言論mā包括伊ê身軀語言。因為án-ne,引起真chē以色列人民ê「抱怨」,講伊「常講謎語」,表示真oh領悟。「謎語」mā thang指譬喻ê意思(參考以西結書十七:2)。

重新查詢 專卷研經 以西結書系列
錯誤回報,請聯繫