以西結書 2章1節 到 2章10節   背景資料  上一筆  下一筆
Tī第一章用真長ê篇幅(第4到28節)紹介先知以西結所看見ê四個活物,其實,若詳細看經文內容就會發現,chit種異象無論描述jōa-ni̍h-á詳細,lóng真oh用筆墨描繪出其樣式,就算照內容畫出來,mā會是一種真奇怪ê圖案。以西結書就是tùi先知以西結所看見ê異象開始記載,而且先kā chit異象描述過了後,chiah說明上帝對伊講ê話,而續落來chit段記載上帝對伊講ê話,篇幅真長,一直到第三章27節chiah結束。

第1節,「必朽ê人!」,chit句話是以西結書ê特色,一再地出現kui卷經冊中,共計出現93次。Tī中文《和合本》是用「人子」,chit-ê詞tī但以理書第七章13節是用來表達上帝差派ê拯救者ê意思。因為án-ne,tī新約福音書中,耶穌不時以「人子」自稱。作者用「必朽ê人」取代「人子」,就是koh khah清楚teh表明一個基本觀念:即使是上帝所揀選ê僕人,mā是人,而且是上帝卑微ê僕人。

「khiā起來!」這是一句真嚴肅ê命令用詞。會出現chit種用詞,真可能就是因為當時先知以西結看見出現tī伊目睭前ê異象後,kui個人就癱tī hia動不à。因為án-ne chit句「khiā起來」mā有命令ê用意,ài先知以西結注意聽上帝對伊「講話」。

第2節,「上帝ê靈進入我內面」,上帝ê靈mā代表上帝ê氣力,是性命ê活力,chit種tùi上帝來ê氣力kā先知以西結「扶起來」,表示上帝kā會kah先知以西結同在,會幫助伊,賜hō͘伊夠額ê氣力。

第3節,chit節講上帝差派先知以西結「到以色列人hia去」,chit種差派已經清楚說明一件事:先知以西結ê工作會真危險。因為當人敢「背叛」上帝ê時,表示連上帝ê話kah誡命lóng m̄驚惶,任何人去傳講上帝ê信息mā無用,甚至kan-taⁿ會面臨性命ê危險而已。

Chit節特別強調以色列人民是tùi in ê「祖先」開始,就有背叛上帝ê事發生(參考耶利米書三十一:32),並無因為過去歷代先知ê提醒、勸勉而悔改,卻是繼續不斷來做出違背上帝旨意ê事,一直到先知以西結時代都無改變。

第4節,chit節講tī上帝眼中ê以色列人民,是「固執剛硬」,chit-ê詞表示m̄知見笑,厚面皮ê意思,mā thang做頑劣解釋(參考出埃及記三十二:9、三十三:3、5、三十四:9)。Koh講,剛硬mā teh表明心內麻痺,聽bē落去上帝ê聲音。先知以賽亞、耶利米lóng有tùi上帝來仝款ê信息(參考以賽亞書六:9—10,耶利米書五:2—3)。這teh表示以色列人民根本就不「不尊重」上帝ê話,無kā上帝ê話khǹg tī心裡,拒絕聽從。

第5節,「不管」以色列人民「聽m̄聽」,先知以西結lóng一定tio̍h去傳。伊去傳,表示伊盡了責任,若伊m̄去,就表示伊怠忽職守(參考以西結書三十三:1—6)。

「in就知影bat有一位先知tī in中間」,chit句話會被記起,就beh tī tāi-chì過了後chiah會顯明出來(參考以西結書三十三:33)。先知耶利米mā bat強調,一個人是m̄是真正先知,tio̍h等伊傳講ê信息實現ê時,chiah ē-tàng判斷(參考耶利米書廿九:9)。Mā因為án-ne,先知tī伊傳講預言ê信息ê時,lóng是孤獨ê。因為in lóng是講未來ê事,大家iáu看bē-tio̍h、摸bē-tio̍h甚至無法度想像會tio̍h。

第6到7節,chit節講出先知以西結會面臨ê遭遇,就是hō͘「反抗」、「看bē起」。上帝甚至提醒伊,差派伊去,ná親像ài伊進入「蠍子中間」,隨時lóng會有死亡ê危險。M̄-koh上帝揀選僕人出去傳達信息ê時lóng會ài in「mài驚」(參考約書亞記一:9,以賽亞書四十一:10,耶利米書一:8、17)。同時「mā mài驚in講ê話」,chit節重複兩pái chit句話,表示當時ê hiah-ê人對先知傳達ê信息,lóng會用非常諷刺ê話語hō͘ in侮辱。Á siōng好ê回應方式,就是無beh chhap。Mā有兩pái強調「不管」以色列人民「聽m̄聽」,伊lóng tio̍h kā上帝ê話「轉告in」,這就是第5節所提起過ê,就算tī siōng惡質ê環境下,mā tio̍h傳達上帝ê信息。因為「in是一陣叛逆ê人」,表示in就算聽見了上帝ê僕人ê聲音,mā bē認錯,kan-taⁿ會狡辯。

第8到9節,「注意聽」,這是上帝提醒先知以西結tio̍h注意聽祂所beh hō͘伊ê信息。Teh注意聽了後,就beh「開嘴」,kā上帝beh hō͘伊ê「物件食落去」,這真清楚teh說明一件事:上帝ê僕人,只有ē-tàng聽從上帝,bē-tàng違逆上帝ê命令。因為án-ne,chit句「bē-tàng親像in仝款叛逆」之言,真可能是因為先知以西結聽tio̍h上帝beh伊食下「一軸冊卷」ê時,心中有所躊躇。

第10節,chia講先知以西結tī食落去chit軸冊卷chìn前,是「看見冊卷ê正反面lóng寫字」,其實古代ê冊卷,真少正反面lóng寫字,一般來講lóng只有寫tī正面上,因為當時ê紙lóng是用蒲草做ê,tī正面寫ê墨水,真容易滲透到背面。現在chia講正反面lóng寫字,表示beh傳達ê內容siuⁿ chē。Chia強調講所寫ê內容充滿tio̍h「哀悼、吐氣,kah悲痛ê話」,chiah-ê內容lóng是kah悲慘ê性命有關。

重新查詢 專卷研經 以西結書系列
錯誤回報,請聯繫