Chit章是一篇詩歌，mā ē-sái講是一首「輓歌」。類似chit種「輓歌」，除了耶利米哀歌外，詩篇第廿二篇mā是一首哀歌。

「輓歌」這字，tī希伯來文是「qînâ」字，mā thang當做「哀歌」，是用悲哀ê調子來寫做ê詩歌。Thang明白先知以西結tī面對當時惡質ê政治局勢，koh看見當時ê政治領袖kah社會菁英lóng無悔意，只知影繼續放蕩、欺騙、拜偶像、斂財、欺壓等惡質行踏，伊屢屢勸勉，m̄-koh soah koh得bē-tio̍h回應，因為án-ne，為tio̍h表明心中ê絕望，伊寫chit首哀歌表明對國家前途ê絕望，希望用這種方式來喚醒同胞，對未來景況m̄-thang koh再存任何幻想。

Chit篇詩歌是兩首哀歌編輯而成，第一首是第1到9節，這是為君王á是領導者所寫ê哀歌；第二首是第10到14節，chit段詩歌是為猶大國teh beh毀滅而寫ê詩歌。先知以西結ê chiah-ê哀歌lóng是teh隱喻當時ê政治環境kah現實。

這是第一首寓言詩歌。描述一頭大母獅養育了小獅，chit隻小獅學會曉了獵食、食人ê後，卻被掠tiâu帶往埃及去。先知以西結用母獅養育幼獅來形容猶大chit-ê國家ê運命，反應出當時政治ê生態kah危機。Chit種用獅來形容國家、君王ê情形，tī那鴻書第二章11到12節mā出現chit種描述。

第1節，「為以色列ê兩個王子唱chit首輓歌」，chia講「兩個王子」，這「王子」指ê是王室，á是國王。兩個王子，一是第4節指猶大約西亞王ê kiáⁿ約哈斯hông擄去埃及去ê事，這是發生tī主前609年；二是第5節ê背景對照第9節來看，則可能是約雅敬ê kiáⁿ約雅斤被掠到巴比倫去，時間是tī主前597年。M̄-koh mā有可能是teh指西底家王，則時間是tī主後586年。

第2節，「你老母是母獅」，這是teh指猶大國，用「母獅」來表示所有君王ê老母。

「蹲伏tī雄獅群中」，表示邊á lóng是對in虎視眈眈ê凶猛國家，想beh kā chit頭母獅獨占，這mā顯示了當時猶大國ê局勢是非常惡質。M̄-koh tī án-ne惡質ê環境下母獅iáu有能力kah辦法kā「小獅養大」，表示上帝á是憐憫，透過猶大國chit-ê老母想出所有ê辦法照顧、養育chiah-ê「小獅」。

第3節，「一隻小獅成做少壯ê獅」，所謂「少壯ê獅」，意思是teh指約西亞ê kiáⁿ約哈斯。Tī主前609年，約西亞王率兵對抗埃及軍隊，戰死tī米吉多（參考列王記下廿三：29），因為án-ne伊年紀kan-taⁿ廿三歲ê kiáⁿ約哈斯hō͘人民膏立做猶大王（參考列王記下廿三：30b—31）。

「學會曉獵取食物，成做食人ê猛獸」，表示獅長大成做猛獸會「食人」，表示kan-taⁿ會做傷害ê事。隱喻tio̍h約哈斯王「仿效伊祖先ê pháiⁿ模樣，做上帝看做邪惡ê事」（參考列王記下廿三：32）。

第4節，「列國聽見了，kā伊誘進深坑」，這真清楚就是tī約哈斯繼任chiah kan-taⁿ三個月時間，埃及帝國就派出軍隊來攻打耶路撒冷，而chit句「用鉤子kā牠拖到埃及」，表示埃及kā約哈斯掠去埃及做奴隸，而伊後來就死tī埃及（參考列王記下廿三：34b，耶利米書廿二：10—12）。

第5節，「老母等得心焦絕望」，chit句詩歌真清楚teh描述猶大國人民心中ê不安。

「koh另養一隻小獅成做少壯ê獅」，表示約西亞ê另外一個kiáⁿ以利亞敬被埃及國王尼哥任命繼任為猶大國王，並kā伊改名ê約雅敬。

第6節，tùi chit節到第9節teh描述ê，若是照第9節ê「帶到巴比倫」chit句話來看，這並m̄是指繼任為王ê約雅敬kah約雅斤，卻是指後來ê西底家王。因為án-ne，先知以西結是略過約雅敬王kah約雅斤王ê時代，直接描述西底家王ê時代。

「少壯ê獅跟tòe其他ê獅四界徘徊」，chit句話描述西底家王並無照約束臣服tī巴比倫ê統治之下（參考歷代志下三十六：13），伊四界想辦法beh kah埃及聯盟來抵抗巴比倫，這就是chit所在所講ê「四界徘徊」，意思是西底家王想beh脫離巴比倫帝國，無想beh繼續當附庸國。

第7節，「破壞城堡，摧毀城市」，這說明西底家王認為結合埃及帝國，就ē-tàng擴展並強化猶大ê軍事武力，án-ne，伊就ē-tàng想beh án怎to̍h án怎，m̄-koh chit種情勢只有tī開始之初有效，卻因欺壓鄰國而帶來koh khah大ê仇恨。

第8節，「列國tùi四面八方來圍攻」，這意思是列國對猶大ê倒拋。Chiah-ê過去被它欺壓、恐嚇過ê國家，lóng趁巴比倫帝國來侵犯ê時，kah跟tòe而來，以東就是其中ê一例（參考俄巴底亞書第12到14節）。Chia ê「thí開羅網」，意思就是teh指猶大軍隊á是人民，無論án怎躲閃，都無辦法躲避chit pái ê災難，猶大國王西底家被「誘進深坑」，意思是受掠（參考列王記下廿五：1—7）。

第9節，這是teh指西底家受掠後ê情形，伊被「帶到巴比倫王hia」，伊ê kiáⁿ被當tio̍h伊ê面刣死，伊家己ê目睭mā被挖出來，然後伊被銅鍊綑綁拖去巴比倫，mā死tī巴比倫，這就是此節所講ê「koh khah án怎都聽無看tio̍h牠ê咆哮」ê原因（參考耶利米書三十九：4—7）。