以西結書 17章11節 到 17章24節   背景資料  上一筆  下一筆
Chit段經文是teh解釋前段第3到10節所講ê譬喻內容。然後用一首詩歌表示:猶大經過巴比倫ê懲罰了後,續落來是傳來上帝安慰、拯救ê信息。Ná親像頭前有敘述過ê,先知文獻ê特色,就是講一段上帝受氣ê譴責、懲罰,m̄-koh最後lóng是會帶來鼓舞ê信息,m̄-koh chit種信息lóng有一個基本前提:悔改、歸向上帝。

第11到15節,chit段經文是teh解釋前段譬喻ê意義。上帝beh先知以西結問問hiah-ê「悖逆」猶大人民,問問in是m̄是明白巴比倫kā in ê國王kah「伊ê臣僕掠到巴比倫去」,然後命令西底家「宣誓效忠」,而西底家王mā確實bat「奉上帝ê名chiù-chōa忠心」,表示beh對巴比倫帝國忠心,m̄-koh結果卻是違背了這誓言。Thang理解ê是巴比倫ài西底家王chiù-chōa效忠,只有一個原因,就是beh「防止國家復興」,ài猶大永遠歸順tī巴比倫帝國ê統治之下。M̄-koh「猶大王反叛了」,因為西底家並無真心順服tī巴比倫帝國ê統治,伊á是暗中派人去kah埃及帝國串連,想利用埃及帝國來牽制巴比倫帝國。雖然先知耶利米bat警告過伊m̄-thang án-ne做,m̄-koh chit時chūn ê西底家王已經聽bē落去上帝ê僕人先知所傳達ê信息。

第16到18節,chit段經文是上帝對猶大國採取懲罰ê回應。上帝表示一定會照所決定ê計畫去執行。就是西底家「chit-ê王一定會死tī巴比倫」,chit句話thang參考列王記下第廿五章7節。「因為巴比倫王立伊做王」,chit句話thang參考列王記下第廿四章17節。

「巴比倫王前來攻城」,這是主前587年,mā是西底家王在位ê第九年ê十月10日,圍城長到一年六個月時間,mā就是到隔年ê四月。最後耶路撒冷城門開了,會phah開城門,是因為城內鬧饑荒嚴重到hō͘人民無法度忍受ê狀態,甚至父母kah隔鄰交換嬰á煮食來充飢(參考耶利米哀歌四:10,耶利米書十九:9)。Hit年猶大正式滅亡,時間是主前586年(參考列王記廿五:1—3)。Chia講情況嚴重ná親像進行「屠殺」仝款,連埃及想beh「派siōng精銳ê部隊來mā無法度救援」,而事實是後來並無來幫助,就án-ne,猶大滅亡à。真正ê問題是在tī西底家王棄sak誓約。

第19到21節,koh一pái用上帝以祂「永恆ê性命chiù-chōa」一詞,chit種句話mā是以西結chit位先知不時使用ê句型,beh表明kah上帝ê約,tio̍h用性命ê態度來回應。

「因為伊棄sak指我ê名所chiù ê chōa」,這就是頭前第15節所講ê,西底家王用上帝ê名chiù-chōa卻違背誓言,因為án-ne,上帝非常忿怒,決定beh「懲罰伊」。

上帝講beh「thí開羅網」,這表示巴比倫帝國ê軍隊會四面圍困耶路撒冷城,就算西底家王利用地道逃到城外,mā無法度脫逃,雖然伊身邊有「siōng精銳ê」禦林軍隨身庇護,m̄-koh chiah-ê軍人後來lóng棄sak了伊,最後hō͘伊孤立無援而受掠(參考列王記下廿五:4—6)。

第22到24節,這是一首詩歌,表示上帝beh帶hō͘苦難ê以色列民族一個全新ê希望。

「我beh at斷香柏樹ê尖端」,chit句話thang參考第3節,原本是teh指約雅敬被巴比倫帝國hō͘俘虜去做奴隸。M̄-koh現在chia ê「我」卻是teh kí上帝家己。

「香柏樹ê尖端」,表示大衛家族ê kiáⁿ孫,上帝beh kā它「拆下」來,然後重新栽種、培育,ài kā新發出來「幼嫩ê枝子」,「種tī高山頂」。Chia ê「高山」是teh指耶路撒冷。

「茁壯生長,結果子」,表示上帝親自灌ak、看顧、守護,就算siōng脆弱ê性命,mā會koh一pái得tio̍h性命ê氣力。

「各種鳥á飛來做巢,tī樹蔭下chhōe歸宿」,chit種句話表明以色列會重新成做一個強盛ê國家,chit種預言ná親像先知以賽亞所預言仝款(參考以賽亞書五十五:4—5),而chit-ê前提,就是以色列人民會確實聽從上帝ê話、悔改,歸向上帝。

Chit首詩歌講出一個基本信仰認知:驕傲,kā會hō͘人棄sak上帝ê賜福,而上帝看顧卑微、敬畏祂ê人。祂扶持弱小、謙卑ê子民。這mā是耶穌降生ê時,馬利亞ê詩歌中mā清楚講出了chit-ê信息(參考路加福音一:52—53)。

重新查詢 專卷研經 以西結書系列
錯誤回報,請聯繫