以西結書 16章59節 到 16章63節   背景資料  上一筆  下一筆
Chit段經文kah先知耶利米仝款,lóng tī提起受tio̍h上帝嚴厲懲罰了後ê猶大人民,當in Tī痛苦ê境遇中,悔改認罪並呼求上帝憐憫、赦免ê時,慈悲ê上帝會koh一pái接納in重新,kah in立新ê約。上帝有懲罰,mā有救恩,這是kui本聖經ê教示。

第59節,「照你ê行為報應你」,這是聖經ê教導,上帝是會報應ê神。

第60節,「我beh記念你少年ê時chūn我kah你締結ê盟約」,chit句話表示上帝永遠記tiâu當初帶領以色列人民出埃及進入曠野ê時,tī西奈山所立ê約。上帝會信守所立ê約,m̄-koh相對ê,以色列人民卻總tī一段時間了後,便bē記得kah上帝ê約。

第61節,「你接納你ê姊妹tńg來以後」,chia所指ê姊妹,就是tī第46節所提起ê撒馬利亞kah所多瑪,而「接納」,是意思是講chit兩個城市kah人民,有一工lóng會臣服tī南國猶大之下,上帝beh這kā兩地ê人民「交hō͘」in,成做in ê「cha-bó͘-kiáⁿ」,hō͘ in管理。Chia講hit時chūn猶大人民會「感覺見笑」,是因為in發現家己過去bat恥笑北國以色列人民,taⁿ chiah知影家己並無甚麼好誇口ê,甚至家己原本有耶路撒冷kah聖殿做中心,卻無koh khah好ê見證,mā仝款淪落到成做奴隸,因為án-ne,心中會「感覺見笑」。

第62節,chia談起上帝beh「重新」kah猶大人民「立約」,先知耶利米mā傳出仝款ê信息,伊就真清楚強調,上帝beh重新kah以色列人民立新約,而且所beh立ê新約是beh寫tī心版上(參考耶利米書三十一:31—33),因為án-ne,新ê約chiah bē tùi性命中消失á是被疏忽、遺忘。

第63節,這是chit章經文siōng重要ê一節,說明上帝beh用祂ê慈愛來「赦免」猶大人民ê時,chit時chūn in會感覺「慚愧」,甚至連想beh「開嘴」mā「m̄敢」。因為知影家己犯嚴重ê罪感覺見笑萬分。Koh講,這mā說明上帝ê恩典lóng是贏過人ê過犯,因為án-ne人一定會會曉感恩。

重新查詢 專卷研經 以西結書系列
錯誤回報,請聯繫