以西結書 14章1節 到 14章11節   背景資料  上一筆  下一筆
Chit章是談起有關以色列人民ê長老來chhōe先知以西結,雖然chia並無說明in來chhōe先知以西結談kóa甚麼問題,m̄-koh tī第八章1節、第十二章1等處lóng有記載chiah-ê長老來chhōe伊,是想beh瞭解上帝ê旨意。先知以西結ê回答真清楚,若是以色列人民棄sak上帝,必定會帶來滅亡。若是有人ē-tàng得tio̍h生存機會,是因為hiah-ê人對上帝忠實,得tio̍h上帝ê憐憫kah拯救,m̄-koh chiah-ê劫後餘生ê人民,並bē-tàng救別人,只有ē-tàng救家己。Chit種觀念tī第十八章有進一步ê闡述。

Koh講,tī chit章經文中特別提起挪亞、達尼爾,kah約伯等三人,主要tī重新解釋以色列人民久長以來流傳落來ê觀念:得救,並m̄是óa靠祖先ê庇蔭,chit種觀念需要糾正,chit點mā tī行洗禮約翰ê信息中傳達出來(參考馬太福音三:9)。Ē-tàng得tio̍h上帝拯救ê,唯一ê途徑就是認罪悔改,無其他捷徑(參考耶利米書十八:7—8),約拿書中mā提出chit種信仰認知。

Chit段經文是談起上帝beh先知以西結回答chiah-ê來詢問伊上帝旨意長老ê內容。先知以西結並無hō͘ in chiah-ê長老安慰á是鼓勵ê話,卻是koh一pái kā伊譴責in棄sak上帝,去拜偶像神明ê罪行,chiah會致使今á日淪落成做奴隸ê原因。先知以西結強調上帝ê話就是:只有認罪悔改,chiah是得tio̍h上帝憐憫、赦免ê唯一途徑。

第1節,chia用「以色列人ê長老」chit位詞,代表ê m̄-nā是南國ê長老,卻是包含所有以色列人民ê意思。Chia所講ê「長老」,其實就是全體以色列人民ê領袖,雖然in是tī受掠ê集中營區,á是非常有影響力ê意見領袖。

第2到3節,上帝beh先知以西結回答chiah-ê長老,講chiah-ê帶頭ê長老iáu teh「迷戀」、「跟tòe」偶像ê行踏,因為án-ne,就算in想beh瞭解上帝ê旨意,上帝mā bē「回應in」。Chit種回應等於講上帝無koh垂聽in祈禱ê聲音。

第4到5節,chit兩節所講ê「以色列人」是包括北國以色列kah南國猶大ê人民,mā是表示北國以色列會滅亡,以及現在南國面臨ê滅亡問題,lóng是kah人民去拜偶像有關。上帝用chit種方式「親自教示」in,上帝希望用chit種方式「贏tńg來」全體以色列人民對祂ê「忠心」。

第6節,希伯來文所用ê「tńg來」,意思是teh指「轉向、轉離」,chiah-ê用詞lóng是teh指「悔改」ê意思。上帝beh祂ê子民ē-tàng「棄sak」現在拜ê「偶像」,mā就是hiah-ê hō͘上帝「憎恨ê物件。上帝所喜愛ê,就是祂ê子民對祂忠誠。

第7到8節,chia第7節thang參考第4節,而第8節thang參考第十三章9節。

Chia講tio̍h上帝要求ê範圍擴大到khiā起tī以色列人民「中間ê外僑」,原因是chiah-ê僑居tī in中間ê人,若是拜偶像,就會影響tio̍h in對上帝ê忠心。In既然「棄sak」上帝,soah koh想beh透過先知明白上帝ê旨意,這是侮辱上帝ê神聖。因為án-ne,上帝beh「親自教示」、懲罰in,koh khah嚴厲ê是beh「開除」in,hō͘ in無koh是上帝ê子民。

第9到11節,chit段經文是假先知ê問題,in kan-taⁿ會講虛假ê話來迷惑人民。Chia真清楚指出,會有假先知出現,是上帝允准假先知去迷惑祂ê人民。因為以色列人民已經去拜偶像神明,koh想tùi先知得tio̍h上帝ê旨意。Á chiah-ê先知並無真實傳達上帝ê信息,卻是為tio̍h取悅人民講假話,hiah-ê人雖然知影in是假先知,卻附kah in所講ê話。因為án-ne,上帝必定會追究聽從假先知ê人民。上帝會án-ne做,是為tio̍h希望chiah-ê棄sak上帝ê子民kah眾先知,會知影回轉過來,而知影走chhōe上帝ê憐憫、赦免,然後「無koh犯罪而污辱家己」,án-ne,上帝會照所立ê約,承認以色列人民就是祂ê子民,祂beh做in ê上帝。這mā是先知以西結所強調ê,上帝會用懲罰來篩選忠實ê子民,koh一pái重新揀選。

重新查詢 專卷研經 以西結書系列
錯誤回報,請聯繫