以西結書第一章1節到第三章27節，chit段經文真清楚記載tio̍h先知以西結hō͘上帝呼召ê經過。這kah其它先知書teh紹介先知ê寫法大無相仝；一般來講，只要phah開先知文獻來看，真容易就會看tio̍h一個共同特色，作者lóng會先紹介先知本身ê時代背景，以及hō͘上帝呼召ê經過（參考耶利米書第一章1到1節、何西阿書第一章1節、阿摩司書第一章1節）。M̄-koh chit本經冊卻用長到三章ê篇幅teh紹介先知以西結受呼召ê經過，kah用身軀語言來表示上帝beh伊傳講ê信息。

Chit本經冊siōng特別ê所在，就是大部分是使用第一人稱來敘述，表示這是先知本人teh述說家己ê性命經歷。不過，chit本經冊雖然是用以西結ê名稱，卻真少交帶先知以西結ê家庭背景，mā因為án-ne有關先知以西結ê身世背景認bat mā真少。唯一清楚ê，就是伊活躍ê時期tī主前593到571年之間。

第1到3節，chit三節mā是chit本經冊ê序言。短短三節經文卻真清楚講出時間、地點，thang明白此經冊ê社會曉背景。

Chia講時間是「第三十年四月初五日」，第2節則真清楚講he是「約雅斤王受掠後第五年」，而約雅斤hông擄去巴比倫ê時間，大約是tī主前598 á是597年。伊在位時間非常短，只有短短三個月而已（參考列王記下廿四：8）。因為án-ne，「受掠後第五年」，ná應該就是tī主前593 á是592年之間。M̄-koh這「三十年」是怎樣算？聖經學者各有無仝見解。有一種講法是：先知以西結是tī主前623年出世tī耶路撒冷。Chia ê「三十年」，真可能就是teh指先知以西結三十歲ê時chūn，得tio̍h上帝呼召ê信息，這是照摩西律法規定，祭司是tùi三十歲開始服事（參考民數記四：23、37）。Án-ne tú好thang符合頂面所講「受掠後第五年」ê時間。

先知以西結看見「天開」，並且「看tio̍h上帝ê異象」，chit句話表示先知以西結kah上帝之間有特別ê關係。先知以西結是祭司，是「布西ê kiáⁿ」。伊「聽見」上帝對伊講話，mā感受tio̍h上帝ê「能力充滿」tio̍h伊。Chia ê「能力」一詞mā thang做「靈」、「手」字解釋（參考以西結書三：14、22、八：1、三十三：22、三十七：1、四十：1）。