Chit段經文是用「輪á」來延續敘述四活物ê景象。

第15節，「活物ê邊上lóng有一個輪á」，而chiah-ê「輪á」是「觸地」ê狀態。對照第十章9節來看，tī chit ki-lō͘-pek ê身邊lóng有一個輪á。頭前講四活物lóng有筆直ê腿，有腳蹄（參考第7節），m̄-koh現在是講chiah-ê活物各有「輪á」thang代替筆直ê腿來行動，mā就是講in無需要使用腿。

第16到17節，講tio̍h輪á是「彼此直角相切」，chit句話已經說明chit四個活物beh行動，並無需要轉向，隨時隨地lóng thang照需要，向某一個方向向前行。

第18節，chia講「輪kho͘-á上有真chē chē目睭」，chit句話mā說明chiah-ê輪á ē-tàng詳細看清楚周邊所有ê一切景象，無任何事物ē-tàng隱藏這四活物ê目睭。

第19到21節，chit節講出chit四個活物kah in ê輪á是連結成一體ê，koh khah重要ê，輪á lóng是順服四活物ê指令，因為四活物控制tio̍h輪á。

第22節，「圓頂」，chit-ê詞原本是teh指「空氣」ê意思，mā ē-tàng指「太空」（參考詩篇一五○：1）。作者講「ná親像用顯（hiáⁿ）目ê水晶做ê圓頂」，意思是teh指一個堅實ê硬體，造型為弧形ê檯子樣式，chit-ê ná親像有弧形ê檯子是khǹg tī「四個活物頭殼頂」，看起來ná親像水晶一般非常「顯（hiáⁿ）目」。

第23節，tī chit四活物ê頭殼頂是「圓頂」，然後四個活物用in身上ê「一對翼股，kah附近ê翼股連接」，這mā是第9節已經講過ê。然後用「另外一對翼股遮蓋家己ê身軀」，án-ne，就ē-tàng清楚看出一幅清楚ê圖案：四個活物頭殼頂頂tio̍h一個帶有弧形ê檯子，然後四個活物各自kā身上ê一對翼股伸出來彼此相扣tio̍h。Á坐tī這圓頂上ê，就是上帝。祂會下令hō͘這四活物移動ê方向，á是teh指示beh去ê所在。

第24節，「翼股所發出ê聲音」，這說明活物身上ê翼股，並m̄是靜態ê，卻是一直teh飛舞phah動。Chia用三種無仝ê響聲來描述chiah-ê翼股phah動ê聲音：

一是「kah-ná大海tī澎湃」。

二是「像大軍tī喊hoah」。

三是「像全能上帝ê聲音」。

第25節，chit節並無說明當活物ê翼股停止拍phah後，繼續tùi「圓頂傳來」ê聲音，到底是甚麼內容。有可能是上帝選召先知以西結ê聲音，m̄-koh mā可能是上帝準備進行審判ê聲音。

第26節，tī chia chiah講出圓頂上有一個「寶座」，這寶座是用「藍寶石造ê」。Chia用「圓頂頂面」，意指天頂。聖經作者若提起天頂ê「寶座」ê時，指ê就是上帝ê位置，而chit種「寶座」並m̄是任何一個君王ê座位ē-tàng比並。

「頂面坐teh ê kah-ná是人」，先知以西結非常小心地使用「kah-ná」chit-ê詞，chit-ê詞mā teh表示伊並m̄是正面看見上帝，卻是tī一種霧霧無清ê狀態下，因為án-ne chiah會用「kah-ná是人」chit種句話來表達照創世記第一章26節ê記載，講上帝是用祂ê「形像」來造人，chit種「形像」並m̄是用人ê詞彙ē-tàng表達出來。

第27節，先知以西結kā親目所見ê描述出來，為tio̍h是beh說明伊m̄是陷入幻想，卻是真正看見上帝kah-ná是人ê樣式。Chia講出頂下兩段落，身軀ê「腰部」為頂下兩段落，伊講tùi「腰部以上kah-ná是擦亮了ê銅」。「腰部以下像火」，表達ê意思是tī上帝ê四周全部lóng光輝燦爛。

第28節，chit節就真清楚指出，chiah-ê亮光lóng teh表明上帝ê「臨在」、顯現。而且chia強調chiah-ê光kah「虹」ê光仝款燦爛，hō͘先知以西結看見這「景象就坦覆 (thán-phak）tī土腳」，因為伊知影chit時就是上帝顯現ê時刻，mā就tī chit時chūn，伊「聽見」了上帝傳hō͘伊ê聲音。