出埃及記 8章20節 到 8章32節   背景資料  上一筆  下一筆
這是第四個災難—蒼蠅之災。這是屬tī「耶和華文獻」特有ê資料。Tī詩篇第七十八篇45節、第一○五篇31節mā提起此災難。

第20到24節,上帝koh一pái差派摩西去見埃及王,koh一pái ài埃及國王tháu放以色列人民—上帝ê子民—去「敬拜」祂。若伊拒絕,上帝會施行「蒼蠅」ê災難。

第20節強調hō͘以色列人民離開埃及,為tio̍h是beh hō͘ in去敬拜上帝,chit點是出埃及記主軸ê信息,mā thang看出kui本出埃及記,就是一個宗教運動。

第22節講出一個重要ê信息,以色列人kah埃及人tio̍h區別出來。Tī in所khiā起ê歌珊之地,連「一隻蒼蠅mā無」。蒼蠅是會四界亂飛ê昆蟲,卻會聽從上帝ê指令。因為蒼蠅mā是上帝創造之物。連chiah-ni̍h細ê昆蟲lóng知影上帝就是性命ê主宰,會聽從上帝,á埃及國王kah人民卻拒絕聽從。上帝會án-ne懲罰埃及國王kah人民,就是beh hō͘ in知影祂chiah是「全地ê主」,表示上帝是大地ê主宰,祂差遣蒼蠅進入埃及人khiā起ê所在。

第25到27節,埃及國王終其尾表示願意hō͘以色列人民去敬拜上帝,m̄-koh限定tī埃及ê「國境內」去向上帝「獻祭」。M̄-koh摩西表示giâu疑,因為宗教信仰差別,會致使埃及人騷擾以色列人民ê獻祭,原因是以色列人民獻祭thang用牛,á埃及人kā牛當做神明來看,chit點tùi以色列人民後來進入曠野後,bat用金子鑄造金牛崇拜ê事件看出來(參考出埃及記三十二:4)。因為án-ne,摩西堅持beh「旅行三工,到曠野」去向上帝獻祭。

第28到29節,就án-ne埃及國王只好妥協,伊若無妥當協,蒼蠅ê災難確實造成生活bē-tàng安寧。M̄-koh伊要求無法度行太遠,á koh khah重要ê,伊ài摩西為伊向上帝祈禱。摩西答應tī離開埃及ê時chūn,就為伊祈禱。M̄-koh伊提醒埃及王無法度「欺騙」,因為埃及王已經有真chē pái不守諾言à。

第30到32節,埃及王koh一pái欺騙摩西,當蒼蠅lóng消失了後,國王ê「心猶原剛硬,不放以色列人民行」。Án-ne等於是欺騙上帝,一定會帶來koh khah大ê災難。	

重新查詢 專卷研經 出埃及記系列
錯誤回報,請聯繫