出埃及記 8章1節 到 8章15節   背景資料  上一筆  下一筆
Chit章是由「耶和華文獻」ê資料(第1到4節、第8到15節、第20到32節等等),kah「祭司文獻」(第5到7節、第16到19節等等)合編而成。Tī chit章中,主要提起十大災難中ê第二到第四個災難,包括了水雞災(第1到 15節)、蝨母災(第16到19節)、蒼蠅災(第20到32節)。

這是第二個災難,其嚴重性thang tùi第3到4節看出來。詩篇第七十八篇45節、第一○五篇30節等等lóng有記載chit-ê災難。

第1到2節,koh一pái強調上帝ài摩西帶領以色列人民離開埃及ê主要原因,就是beh以色列人民敬拜祂。這是屬tī宗教改革ê運動,是為tio̍h beh以色列人民遵行in祖先kah上帝所立ê永遠之約。若埃及國王繼續反對,上帝會用水雞塞滿kui個國家當做懲罰。

第3到4節,描述水雞之災, 水雞kā塞滿kui個埃及河川渠道,連臥室、灶腳、身上lóng有,這是無法度想像ê景況。說明只要上帝伸手懲罰lóng真嚴重。

第5到7節,就án-ne懲罰開始,上帝ài亞倫kā手裡ê柺指向所有河川、渠道、湖泊等,結果就親像上帝所講ê hit種。M̄-koh第7節ná親像第七章11節仝款,埃及國王認為chit種tùi上帝來ê懲罰,只不過ná親像teh進行一場「法術」beh表現能力而已。所以,伊mā tio̍h埃及ê「巫師採行法術」,m̄-nā無減低á是除滅災難,卻是hō͘水雞ê災難koh khah嚴重。這說明一件重要認bat:人想beh抵抗上帝ê作為,結果m̄-nā無用,反tńg為家己帶來koh khah大ê災難。

詩篇ê作者bat án-ne描述:「祂 hō͘ 胡蠅 kui 陣到 in 中間來沾 in,koh hō͘ 田蛤 á 來 kā in 損害。(全民版)」(詩篇七十八:45)

第8到9節,這是埃及國王第一pái請求摩西kah亞倫,向上帝祈求,kā災難消除。伊答應hō͘摩西帶領以色列人民「去向上主獻祭」。摩西就接受。第9節講時間隨在埃及國王家己決定。其實,時間m̄是操縱tī埃及國王手中,卻是tī上帝手中。Thang由埃及國王家己選擇時間,原因是伊ê巫師行法術mā需要看ê時辰,若無,就無成效。M̄-koh全能ê創造主,時間、土地lóng是祂ê手創造ê。

第10到13節,埃及國王講出「明á載」了後,摩西馬上答應,並且tī隔工就向上帝祈求。伊mā提醒埃及國王「天下無親像上主—咱ê上帝仝款ê神」,chit句話已經teh kā埃及國王講,伊m̄是神,只有以色列人民ê上帝chiah是。Chit對埃及王來講是真大ê衝擊。

「只有尼羅河中iáu有」,表示bē kā水雞全部滅絕,iáu保存尼羅河下游ê沼澤地帶,ná原本就是水雞ê歇ê所在。

第13到14節講上帝聽摩西ê祈禱,kā堆積如山ê水雞清除掉。Beh tī短短一工時間內kā所有水雞殺盡,只有全能ê上帝chiah有辦法。M̄-koh卻因為堆積起來ê水雞屍體清運不完,á發出惡臭。表示chiah-ê水雞災難m̄是想像ê,卻是真實ê。

第15節,埃及國王看見水雞ê災難消除後,伊隨時改變心意,mā毀了伊對摩西所講ê應允,「心koh剛硬起來,不聽摩西kah亞倫」,m̄ hō͘以色列人民離開埃及去敬拜上帝。
重新查詢 專卷研經 出埃及記系列
錯誤回報,請聯繫