出埃及記 40章1節 到 40章21節   背景資料  上一筆  下一筆
Chit章kah第三十九章有共同ê特色,就是出現七pái:「這是照上主吩咐摩西做ê。」(第19、21、23、25、27、29、32節等等)chit句話ê型態kah創世記第一章一再重複句:「一切就照伊ê命令完成。」(創世記一:6、9、15、24、30)是仝款ê句型。Thang án-ne講,kui個出埃及運動就是tī「一切lóng照上帝吩咐摩西做」之下chiah完成ê,而且相當完美。換句話講,如果無「照上主ê吩咐」,想beh用人ê氣力來完成出埃及ê運動,he是無可能ê。特別是tī曠野四十年ê時間,ná koh khah困難。因為án-ne,後來申命記ê作者án-ne寫講:「Hō͘ 你謙卑,hō͘ 你 iau 餓,用你所m̄ -bat,你ê 祖先mā m̄ -bat ê 嗎哪養飼你,hō͘ 你 thang 知人 m̄ 是 kan-taⁿ óa 靠餅來活,人是óa 靠上主ê 嘴所講一切ê 話來活。(全民版)」(申命記 八:3)

第四十章mā ē-sái講是tī建造聖幕ê工作上做一個總結,mā就是出埃及記後半ê一個結束。因為出埃及記全部四十章,tùi第一章到第廿四章,lóng是kah上帝呼召摩西去帶領以色列人民離開埃及,以及kah以色列人民立約有關,然後tùi第廿五章開始到第四十章提起真chē關係聖幕ê tāi-chì,其中除了第三十二到三十四章,是因為以色列人民悖逆上帝去拜金牛偶像,致使上帝非常忿怒,á koh一pái提起重新立約ê事外。因為án-ne,這第四十章主要就是記載chiah-ê建造聖幕ê事,mā是結束這部分ê記事。

Chit段經文講tio̍h建造好ê聖幕,ài如何架設起來。

第1到2節,講出正確ê時間,是tī「正月初一」,對照第17節,提起hit一工是in「離開埃及後ê第二年正月初一」。後來以色列人民就tī每年正月初一到聖幕前敬拜上帝,感謝上帝帶領in離開埃及。這就成做今á日台灣長老教會tī每年農曆年初一舉行新春感恩禮拜之背景。

第3到5節,chia講tio̍h安放約櫃,以及供桌、燈臺、香壇,kah聖幕ê帳幕之pái設等規矩。

第6到8節,這是講tio̍h祭壇、洗腳手ê銅盆,以及聖幕周圍ê圍籬kah進入聖幕前ê門簾。

第9到11節,chit三節thang參考第三十章26到28節。講tio̍h聖幕裡ê用品,包括油、香、器具等物件,lóng tio̍h kah厝裡用ê區隔出來。因為用來敬拜上帝之物件,kah厝裡生活用品有所區別,表明ê是「分別為聖」ê意思。

第12到15節,這幾節特別講tio̍h祭司怎樣hō͘家己潔淨了後,chiah thang上祭壇去執行祭司為人民辦理獻祭ê禮儀記事。包括穿插祭司禮服應注意ê事項lóng有提起。

第16節,每一個環節說明後,lóng會重複敘述chit句:「這一切摩西lóng照上主所吩咐做。」(第19、21、23、25、27、29、32節等等)表示做這一切lóng真慎重,絕對m̄是因個人喜好á做。

第17到21節,摩西親自督導架設聖幕ê工作,並且tī聖幕架設好了後,由摩西親自kā上帝頒布hō͘以色列人民ê誡命石版khǹg入約櫃中。聖幕siōng主要用意,就是pái放約櫃,約櫃則teh表明上帝kah以色列人民同在,因為án-ne,聖幕就成做以色列人民ê中心,後來聖幕被聖殿所取代,á聖殿就是in信仰ê中心。

重新查詢 專卷研經 出埃及記系列
錯誤回報,請聯繫