出埃及記 37章1節 到 37章9節   背景資料  上一筆  下一筆
Chit章講tio̍h聖幕內ê五種重要聖物,包括siōng重要ê約櫃(第1到9節);供桌(第10到16節);燈臺(第17到24節);香壇(第25到28節),最後是關係製造聖油kah香(第29節)等。

Chit段關係造約櫃ê方法,tī第廿五章10到22節mā已經清楚記載。

約櫃是聖幕中siōng重要ê物件,teh代表上帝kah以色列人民之間ê「約」ê關係。因為約櫃內面有khǹg摩西tùi上帝領受beh頒發hō͘以色列人民ê誡命石版,chit-ê誡命mā teh表示以色列人民會永遠尊崇上帝是in kui個民族ê性命中心。因為án-ne,約櫃主要teh表明上帝kah以色列人民同在。

第1節,chia提供主要負責製造ê人名叫比撒列。伊是相當有才智ê人,mā是充滿上帝ê靈ê人(參考三十一:2—3)。因為án-ne,tī製造約櫃ê工作上受交託重任。

第2到6節,chia真詳細地說明整座約櫃是「用純金」包裹起來,兩支用金合歡木製造作扛約櫃ê槓子,mā tio̍h用金子包起來。

第7到9節,tī約櫃ê頂面有蓋子,蓋子ê兩端各有一個「基路伯」,所beh表達ê意思是「祈禱者」,就是象徵tio̍h替人民向上帝祈禱。以色列人kā基路伯看做是天使中ê一位,專門teh負責看守上帝kah以色列人民ê約。約櫃內面khǹg tio̍h上帝頒發hō͘以色列人民ê「約」ê石版,櫃蓋頂面有基路伯,意思就是上帝ê天使—基路伯—看守約櫃,mā守護tio̍h約。

重新查詢 專卷研經 出埃及記系列
錯誤回報,請聯繫