出埃及記 30章1節 到 30章10節   背景資料  上一筆  下一筆
Chit章講tio̍h ê問題有聖所內面所需要配備ê物件,包括燒香ê壇;洗手kah洗腳用ê銅盆;製造聖油、香等物件ê規矩。

Chit段經文是有關燒香ê壇ài怎樣建造ê細則。Chit-ê壇mā稱做「金壇」(參考列王記上七:48),因為這是一個用黃金包裹起來壇(列王記上七:48)。

後期ê詩人講「香」,就ná親像是上帝子民祈禱ê聲音,跟tòe香ê煙,裊裊上升到上帝hia(參考詩篇一四一:2)。是以色列人用來表示「真實ê心,祈禱tī上帝面前」ê一種象徵,表示人ê內心ná親像「香」仝款有好氣味呈到上帝面前。Mā因為án-ne,後來有一個傳統,只要是輪值祭司抽籤會得thang進入到聖所獻香祈禱ê時,民眾就會到聖所外面聚集祈禱。Án-ne,in ê祈禱就會跟tòe祭司獻祭燒香ê時所出現ê煙往上升到上帝ê面前(參考路加福音一:10)。Chit座香壇是hē tī約櫃前帳幔外ê中間,正pêng有供桌,tò-pêng有燈臺。

第1到2節,提起chit座香壇ê形狀是四方形。材質是金合歡木,kah聖所ê木材仝款。

第3到5節,chit座香壇一定tio̍h用金子包裹起來,kah約櫃仝款是thang移動ê。

第6節,香壇一定tio̍h hē tī約櫃頭前ê帳幔外,á上帝會tī帳帷後面ê約櫃出現。

第7到8節,每工ê早起kah beh暗á點香,這香絕對「bē-tàng間斷」。獻上香,mā有另外一個意義,表示thang用香ê氣味消除上帝ê受氣(參考創世記八:21)。

第9到10節,提起禁止kā製造家用香ê材料,用來製造燒hō͘上帝用ê香。後來亞倫ê kiáⁿ拿答kah亞比戶,因為做chit種事,á喪失性命(參考利未記十:1—2)。

每年有一pái為這香壇舉行潔淨ê禮儀,一方面表示製造香ê人,可能因為手不清氣,用潔淨禮來表示贖罪。另外一方面,mā用潔淨禮來清理一pái香壇。

重新查詢 專卷研經 出埃及記系列
錯誤回報,請聯繫