出埃及記 25章1節 到 25章9節   背景資料  上一筆  下一筆
Chit段經文以及第三十四章29節到第四十章止,全部lóng是「祭司文獻」ê資料。Thang tùi chit段經文發見「祭司文獻」ê特色,就是對tī祭祀禮儀ê事相當重視,特別是關係聖幕ê製造、禮儀等。其實,tùi出埃及記第十九章開始翻閱,到民數記第十章10節,差不多lóng是關係祭典方面ê事宜。

聖經作者用chit種方式teh表達一個主要觀念:敬拜上帝ê事,絕對m̄-thang輕忽,ài認真、慎重。Tī舊約聖經時代,宗教信仰被看做是一個民族生存ê要件。雖然tùi chit段經文看tio̍h真chē kāu枝葉ê規矩,卻mā看出對信仰ê堅持kah敬虔ê態度。

是全部祭祀禮儀kah建造聖幕ê「序言」,概略性講tio̍h以後beh敘述ê內容。有一個基本認bat tio̍h先清楚,就是chiah-ê規定所講ê,lóng m̄是摩西帶領以色列人tī曠野漂流時代所呈現出來ê,卻是teh進入迦南後,甚至經過一段相當穩定生活後chiah有ê。親像金、銀、銅等,以及染色ê各種羊毛料,並m̄是tī曠野teh過漂流生活ê時所ē-tàng製造ê物件。Á chiah-ê資料lóng是來自「祭司文獻」,koh khah thang知影ná真可能是tī晚期,mā可能是接近亡國時代ê產品。Chiah-ê資料,只是beh hō͘以色列人知影,若無敬虔ê心敬拜上帝,國家真緊to̍h會淪為伊族侵犯ê對象。

第2到7節,thang對照第三十五章4到9節。Chia提起為tio̍h beh籌建聖幕kah聖幕內ê敬拜物件,是由以色列人甘心樂意奉獻ê。Chia mā列出需要物件之清單。Chiah-ê物件包括大祭司身上beh穿tio̍h ê衫褲。

第8到9節,上帝表示祂beh kah以色列人同在,因為án-ne,ài以色列人為祂建造一個「聖所」。M̄-koh聖所內ê所有物件,lóng一定tio̍h遵照上帝旨意去做。所謂「聖所」,是teh指聖潔ê所在,因為這是beh敬拜上帝ê所在。

重新查詢 專卷研經 出埃及記系列
錯誤回報,請聯繫