出埃及記 24章1節 到 24章11節   背景資料  上一筆  下一筆
Chit章是由「耶和華文獻」ê資料(第1到2節、第9到11節)、「以羅伊文獻」ê資料(第3到8節、第12到14節),以及「祭司文獻」ê資料(第16到18節)編輯而成。

Chit章主要teh說明以色列人án怎回應上帝透過摩西所頒布ê chiah-ê誡命、律法、規例。當摩西對in講上帝頒布chiah-ê誡命、律法ê時,in lóng回答講:「上主所吩咐一切ê命令,阮願意順從遵行。」(第3節、第7節)這是「立約」ê基本態度。Tio̍h注意ê是,聖經teh講上帝kah人「立約」ê時,並m̄是對等ê「約」,是上帝頒布,人一定tio̍h遵行。這清楚說明人kah上帝是m̄-tio̍h等ê位階。創世記作者清楚表示人犯罪ê意念是tùi「會親像上帝」開始(參考創世記三:5),m̄-koh,人「無法度代替上帝」(參考創世記五十:19)。人是上帝親手用祂ê形像創造ê,因為án-ne,一定tio̍h順從上帝ê旨意kah命令,chit點是立約一定tio̍h清楚ê觀念。

Chit章mā ē-sái講是kui個以色列民族大整合ê一章,因為是kui個民族kah上帝立約。因為án-ne chiah有「七十個以色列ê領袖」beh上山去晉見上帝,領受上帝頒布ê律法誡命。

Koh講,立約siōng重要ê是用性命,á性命ê記號是血(參考利未記十七:11)。

第1到2節,上帝ài「摩西kah亞倫、拿答、亞比戶,連同七十個以色列ê領袖tio̍h上山」到上帝hia去。M̄-koh只有摩西一個人「thang到」上帝ê「kah前」,其他以色列人lóng bē-tàng上山。因為he是上帝ê山,是神聖ê。Á這七十個以色列領袖,就是代表全體以色列人民。

第3到8節,摩西kā上帝tī山頂kā伊講,落山後lóng一五一十kā以色列人民講。Á以色列人民mā真清楚ê回應講:「上主所吩咐一切,阮一定遵行。」chia並無說明上帝對摩西講kóa甚麼,m̄-koh tī第十九章5到6節有清楚記載,上帝ài摩西轉告以色列人,in若遵守kah上帝所立ê約,in就是上帝ê子民,是事奉上帝ê祭司。

摩西就tī山下「起造一座祭壇,並khiā立十二支石柱;每一支石柱代表以色列十二支族ê一族」,用獻祭來表示敬拜kah順服上帝ê旨意。M̄-koh chia並無講摩西所寫落來ê「約冊」是teh指toh一kóa,是m̄是十誡?Á是包含其它所說明ê約ê內容。Tio̍h注意,摩西the̍h獻牲祭ê血「hiù tī人民身上」,說明這血是「照」上帝ê誡命kah以色列人「立約ê印記」。

第9到11節,真特別,說明上帝允准以色列ê七十位代表kah摩西、亞倫、拿答、亞比戶同齊上山去晉見上帝。In算是真幸福ê人, ē-tàng親目金金看見上帝,卻無死去。


重新查詢 專卷研經 出埃及記系列
錯誤回報,請聯繫