出埃及記 17章8節 到 17章16節   背景資料  上一筆  下一筆
Chit段經文ē-sái講是以色列人出埃及後,第一pái親自kah攻擊in ê敵人交戰。頂pái是埃及人ê追兵,上帝用分開紅海ê水淹滅了埃及精銳部隊。

Chit-pái以色列人民一定tio̍h親自kah亞瑪力人交戰。Chit件事mā是以色列人民進入曠野後,發生ê第四件記事,第一件事tī第十五章22到26節,飲水ê問題;第二件是第十六章記載有關食物ê問題;第三件是第十七章1到7節有關無水lim ê事件。chit-má是第四件有關kah敵人相刣ê事。

第8到10節,摩西交帶約書亞怎樣挑選壯漢,準備ài kah來侵犯ê亞瑪力人相刣。Chiah-ê壯漢由約書亞帶兵,摩西kah亞倫、戶珥到山頂去觀戰。

Chia第一pái出現約書亞ê名,民數記第十三章有比較詳細紹介約書亞ê事。伊後來就繼承摩西帶領以色列人民進入迦南地。另外一個人就是「戶珥」,伊ê背景資料欠缺。

第11到13節,chit段記事ē-sái講是相刣情況激烈,起先真oh斷定輸贏,m̄-koh只要摩西ê手上揚,就會phah贏,下垂,以色列人民就輸。這表示並m̄是以色列人民teh相刣,其實是上帝透過摩西teh相刣。摩西ê手會「酸」á下垂,表示chit-pái戰爭並m̄是一下á就phah贏,卻是經過一kóa時間,最後有亞倫kah戶珥兩人ê肩膀當做摩西ê扶手,hō͘伊ê雙手ē-tàng繼續mài垂落去,最後約書亞帶領ê以色列人民就phah了勝仗。

第14節,上帝講ài kā亞瑪力人「完全毀滅」,是因為這是一個真惡劣ê族群,申命記第廿五章17到18節án-ne記載講:「你tio̍h 會記得lín 出埃及ê 時,亞瑪力人tī 路裡所款待你ê。伊tī 路裡tú-tio̍h 你, 當你困苦厭倦ê 時, 伊有án 怎phah 你ê 後隊,就是tī 你後面hiah-ê 軟弱ê,伊mā 無驚畏上主。(全民版)」上帝ài摩西kā chit件戰事記錄落來hō͘後代kiáⁿ孫知影。

第15到16節,phah贏仗了後,起造祭壇感謝上帝。第15節講「上主是我ê旗幟」,然後第16節講「高舉上主ê旗幟」,chiah-ê lóng teh表示上帝kah以色列人民同在,in就是上帝ê軍隊。

重新查詢 專卷研經 出埃及記系列
錯誤回報,請聯繫