出埃及記 10章1節 到 10章20節   背景資料  上一筆  下一筆
Chit章主要是由「耶和華文獻」ê資料形成,kan-taⁿ有第1節b句到2節是「祭司文獻」ê資料,以及第12到13節a句、第14節a句、第15節b句、第20到23節、第27節等等是「以羅伊文獻」ê作品,其餘lóng是屬tī「耶和華文獻」ê資料。

Chit章主要提起兩個大災難,就是第八個災難—蝗蟲之災(第1到20節)kah第九個災難—烏暗之災(第21到29 節)。Á烏暗,tī聖經中表示死亡。因為án-ne,當chit-ê烏暗來臨ê時,已經teh暗示to̍h是teh beh來臨ê是koh khah大災難—頭胎者死。

Chit十個大災難是真有秩序排列出現,而且嚴重性是漸漸升高;tùi水變成血→水雞→蝨母→胡蠅→瘟疫(kan-taⁿ限tī家畜身上)→瘡→冰雹→草蜢→烏暗,然後是死亡。Á草蜢ê災難,會hō͘ in陷入iau餓ê痛苦中。

第1到2節,上帝ài摩西koh一pái去見埃及國王,雖然國王kah伊ê臣僕心剛硬,m̄-koh上帝卻ài in認bat對敵上帝會帶來嚴重ê災難。另外一方面,上帝mā ài摩西kā chiah-ê埃及人所領受tio̍h ê災難,當做教材來教導了後代ê kiáⁿ孫,謹記一件事:bē-tàng對敵上帝,成做上帝ê敵人。

第3到6節,摩西每pái去見埃及國王,就是ài國王hō͘以色列人離開埃及,去曠野敬拜上帝。伊提出嚴厲ê警告,若國王iáu是拒絕,會面臨嚴重ê草蜢災難侵襲,致使全國寸草不留,而且chit種嚴重性,其恐怖情景是埃及國王ê「祖宗從來m̄-bat見過ê」。

第7到9節,chit-pái連過去hiah-ê國王身邊ê鷹派臣僕mā建議國王hō͘以色列人離開,免得造成koh khah chē ê麻煩。第7節講出埃及國內眾官員心內ê驚惶,因為tī前幾pái ê災難中,in bat親身體驗上帝懲罰人ê威力,因為án-ne,當in聽tio̍h摩西傳出上帝koh beh懲罰in ,就驚惶(參考九:20),因為每pái災難來臨,連in mā受災(參考八:3—4、21,九:14)。In提醒埃及國王tio̍h清楚知影,「埃及已經teh beh慘死à」。國王就án-ne叫摩西kah亞倫去問,到底是甚麼人beh去敬拜上帝?其實伊問chit-,已經teh說明伊ê心內真m̄情願,而且希望留落來一kóa人質tī手中。M̄-koh摩西ê回答真清楚,是全部ê包括所有ê cheng-seⁿ lóng tio̍h去,這表示in tio̍h離開,m̄是暫時ê、目nih-á ê,卻是永遠離開埃及。摩西強調he是「過節」,表示這是真重大ê節期,是全體以色列人lóng tio̍h參加ê宗教信仰活動,包括家畜mā在列,原因是需要獻祭。Koh講,守安息日,á是其他重大節期,連cheng-seⁿ動物lóng tio̍h跟tòe歇睏。因為án-ne,帶出去,in chiah ē-tàng知影tó一kóa thang活動,tó一kóa bē-tàng。

第10到11節,國王一聽摩西án-ne講,就清楚知影若放以色列人án-ne離開,就無可能tńg來à。因為án-ne,伊強烈反應,一定tio̍h kā婦女kah gín-á留落來,只准「男丁」離開。所講ê「男丁」是指年滿二十歲ê cha-po͘人。Chia講埃及國王只准摩西帶以色列人中ê男丁去,是非常奸巧ê計謀,因為只hō͘男丁離開埃及是無法度延續後代ê。換句話講,伊chit種作法,kah滅族ê手段明明是同出一個法度。

第12到15節,就án-ne,上帝ài摩西施行神跡奇事,果然草蜢tùi四面八方飛到埃及,「蓋tòa大地;地上一片烏暗」,真正是所謂「草蜢過境,寸草不留」,in ê厲害用腳頭u想mā知。即使現今科技hiah-ni̍h發達,tú-tio̍h「草蜢過境」mā仝款束手無策。草蜢帶hō͘人類siōng大ê威脅,就是食了了所有農作物會死亡,嚴重波及人類生存ê需要。

第16到20節,這是國王第二pái認錯,第一pái是tī第九章27節。Chit-pái國王表示承認得罪上帝,mā失禮摩西。伊mā承認chit-pái ê災難是「致命ê懲罰」,伊懇求摩西向上帝祈求「赦免」,解除chit-pái ê災難。摩西接受埃及王ê道歉,就án-ne向上帝祈求,上帝就是hiah-ni̍h輕易就ē-tàng kā所有ê草蜢消滅殆盡。這mā說明,tùi上帝來,上帝收tńg來。M̄-koh想beh用人ê能力收tńg來上帝所創造之物、阻擋上帝命令之行為lóng是愚戇無知ê。



重新查詢 專卷研經 出埃及記系列
錯誤回報,請聯繫