Chit位新ê王除了採用「苦工」、「奴役」對付以色列人民外，mā同時採用「滅族」ê方式。這是為tio̍h beh抑制人口ê急速成長之故，á採取ê強制手段。

第15到18節，埃及國王採取兩種壓制以色列人民ê方式，其一是kā in貶為「奴工」，意思是hō͘ in非常低ê工資，m̄-koh相對ê，是非常嚴苛ê勞務工作。另外一種是採取特別ê人口政策，就是生「男嬰，就刣死，女嬰，就hō͘伊活落去」，這tī當時以男性為傳承中心ê社會kah世代，chit種政策等於是「滅族」仝款。

第17節是kui個出埃及運動ê中心思想，chit兩個被命令執行埃及國王指令ê希伯來接生婆是「敬畏上帝，不服從國王ê命令」，thang參考使徒行傳第四章19到20節，彼得kah約翰tī猶太人siōng koân議會中ê回答。聽從人，thang活得一時，mā thang tī物質生活上得tio̍h想beh ê，m̄-koh真實ê性命是在tī聽從上帝語。Kui本出埃及記ê故事就是用上帝語kah埃及王、人做對照結構起來ê。

埃及國王對chit兩位希伯來接生婆無照伊ê諭令做tāi-chì感覺bē了解，詢問為甚麼iáu繼續hō͘男嬰活teh？

第19到22節，chia koh一pái強調chit兩位接生婆「敬畏上帝」，所以「上帝特別看顧in」，賜hō͘ in有聰明ê智慧，知影怎樣回答。耶穌mā講過，tī受tio̍h迫害á被帶到法庭ê時，m̄免擔心該講甚麼話，因為聖神會幫助被迫害者講話（參考馬可福音十三：11）。

Chit兩位接生婆回答講「希伯來ê婦女無親像埃及婦女；in真強健」，chit句話mā teh隱喻以色列人民已經被逼迫teh過奴隸ê生活。

第21到22節說明tī困苦中，上帝iáu-koh無棄sakin，kah in同在，hō͘ in tī困苦中iáu-koh充滿tio̍h性命力，人口繼續增加。M̄-koh埃及國王ê命令jú來jú嚴苛，伊用chit種方式對敵上帝。