以弗所書 6章1節 到 6章4節   背景資料  上一筆  下一筆
談完夫妻關係了後,續落來是談父母kah子女ê關係。Ná親像我tī頭前一講所講ê,使徒保羅談夫妻關係,是先tùi bó͘ ê角色講tio̍h,然後談丈夫。chit-má談父母kah子女ê關係ê時,mā是先談子女,了後chiah談父母。

Thang tùi兩個角度來看chit段經文:一是當使徒保羅tī講tio̍h子女對父母ê本份ê時,siōng基本ê基礎mā是tī第五章21節所講ê彼此順服,chit點mā是家庭生活ê基礎。無論是甚麼人,tī家庭生活中ê第一要義,就是tùi「順服」ê心開始學起。二是伊是用上帝頒hō͘以色列人民ê十條「誡命」做基礎,講tio̍h子女「聽從」父母ê意義kah責任。

第1到3節,chia開始使徒保羅就講作kiáⁿ ê,tio̍h「聽從父母」,伊講這是本分。Tio̍h注意ê是,使徒保羅tī chia用ê「聽從」,kah伊teh談夫妻彼此「順服」ê意思相差真chē。當伊tī講bó͘「順服」丈夫ê時,mā同時用「Agape」ê「愛」來平衡。因為án-ne,夫妻ê關係是「彼此順服」,是相對ê。M̄-koh,tī講tio̍h kiáⁿ kah父母ê關係ê時,並m̄是án-ne,卻是用koh khah強ê「聽從」chit-ê字。Chit-ê字有上、下之間ê關係。是下階ê人teh聽上階ê人講話,伊講這是因為基督耶穌ê緣故。特別ê是伊提起十誡中ê第五誡:「Tio̍h 孝敬你ê 老父,你ê 老母,hō͘ 你 ê 日子 tī 上主 — 你 ê 上帝所賞賜hō͘ 你 ê 地,得tio̍ h 久長。(全民版)」(出埃及記二十:12),kah申命記ê寫法:「Tio̍h 孝敬你ê 老父,你ê 老母,照上主 — 你 ê 上帝所命令你 ê,hō͘ 你 tī上主 — 你 ê 上帝所賞賜 hō͘ 你 ê 所在,日子久長,來享受福氣。(全民版)」(申命記五:16)伊m̄-nā引用chit條誡命,甚至進一步解釋chit條誡命講:「這是第一條帶應允ê誡命。」tī上帝頒布ê十條誡命中,頭前四條誡命lóng是講tio̍h人kah上帝之間ê關係,tùi第五條開始,講tio̍h人kah人之間ê關係。Á tī講tio̍h人kah人ê關係ê時,只有chit條講有上帝賜福ê誡命,其他都無。

第4節,chit節ê「老父」一詞,所代表ê是「父母」ê意思。使徒保羅講tio̍h父母應有ê兩項責任:一是m̄-thang激怒gín-á,二是beh用主ê教導來養育栽培gín-á。Chia所講ê「激怒」,tī希臘文是由「para」kah「orgizo」chit兩個字合併做伙ê。「para」是teh指「不正常、不正當」ê意思,「orgizo」,是受氣、受氣ê意思。二者合起來是teh指:以不正當ê方法,á是無合理ê方式,hō͘人受氣、受氣。使徒保羅勸為人父母ê,m̄-thang用無正當ê方式,á是無合理ê方法,致使gín-á受氣、受氣。使徒保羅同時進一步指出,身為父母ê,一定tio̍h「tio̍h用主ê教導來養育栽培」gín-á。伊m̄是講beh用「權威」、「傳統」,á是甚麼大ê理論,卻是講「主ê教導」。所謂「主ê教導」非常清楚ê,是teh指「聖經」—上帝ê話。Kui本聖經教導hō͘咱ê就是:一、tio̍h疼上帝,二、tio̍h疼別人。

重新查詢 專卷研經 以弗所書系列
錯誤回報,請聯繫