以弗所書 5章1節 到 5章20節   背景資料  上一筆  下一筆
Tī使徒保羅ê書信中一再強調基督徒ê性命觀,應該kah iáu未信耶穌chìn前有無仝。伊以「新我」kah「舊我」做對比來形容,伊講做「新我」ê人,就ná親像是一個重新受創造ê人一般,有「上帝ê形像」,表現出來ê是「正義kah聖潔」;而「舊我」,是生活tī私慾ê誘惑中,是腐化ê、流俗ê。

Chit-má第五章是繼續teh討論有關基督徒ê生活內涵。Tùi使徒保羅所寫ê書信中mā發見一點,就是講tio̍h生活ê層面ê時,lóng是非常具體、實在。換句話講,伊ê教導並m̄是生活經驗之外,á是oh得實踐ê事,卻是大家lóng做會到ê事。問題只在tī願無願意照án-ne去做而已。

Chit段經文是有關基督徒ê社會生活方面ê問題。
第1到2節,chia一開始就講tio̍h信耶穌ê人,ài有chit份自信,自認是上帝所kah意ê kiáⁿ,因為án-ne,基督徒tio̍h效法ê對象,就是上帝。換句話講,mā就是用上帝為準則。耶穌tī山上寶訓中án-ne講:「Lín tio̍h 做完全ê人,親像lín ê 天父。」(全民版)」(馬太福音五:48)伊koh講:「Lín tio̍h 有憐憫ê 心,親像lín ê 天父teh 憐憫人。(全民版)」(路加福音六:36)kā標準khǹg tī上帝ê準則上,人就知影家己ê有限,bē驕傲à。當人bē記得上帝,人就會認為家己真了不起。上帝既然chiah-ni̍h疼人,連祂ê獨生kiáⁿ耶穌lóng ē-tàng犧牲tī十字架上,就是beh顯示祂拯救ê疼,án-ne,所有ê基督信徒lóng應該學習chit種犧牲ê疼。

第3到5節,chia提起基督徒siōng忌諱ê事有三項:淫亂、污穢,kah貪婪等。因為這三項lóng是會hō͘耶穌tī十字架上救贖ê恩典hō͘踐踏à。使徒保羅特別強調講有這三項罪名ê人,絕對無法度成做上帝國度ê子民。伊特別指出「貪婪等於拜偶像」,因為貪婪就是對上帝無信心chiah會做出ê行為。

第6到7節,chia所講ê「空口白話」,意思是虛妄、不誠實、欺騙ê話語,會講chit種話,就等於做假見證仝款,bē榮耀上帝。使徒保羅勸勉以弗所教會信徒,siōng好m̄-thang kah chit種人來往。

第8到13節,chit段經文中,使徒保羅以「烏暗」kah「光明」來表明一個基督徒應該有ê生活態度,是kah iáu未信靠耶穌ê以前有差別ê;信耶穌了後,做tāi-chì為人ê態度是光明磊落。相對ê,tī iáu未信耶穌chìn前,人ê心中常常會有一個念頭:無人知影暗地發生ê事,m̄相信上帝會鑒察人心內ê意念。M̄-koh chit-má信耶穌了後,就無koh是án-ne,卻是會因為ē-tàng坦蕩蕩地做tāi-chì,感謝上帝ê恩典。使徒保羅講人ê行為光明會結出「良善、正義,kah真理」ê果子。基督徒ê時常思想:甚麼是主所歡喜ê事。有chit種念頭存在心中,就bē去做無應該做ê事。

第14節,使徒保羅tī chia引用一首詩歌,m̄-koh無法度明明確知影出tī何處。伊用chit首詩歌是beh表明一個基督徒,ná親像一個koh活ê人仝款,伊無koh生活tī「烏暗」(死亡)ê中間,卻是有koh活(光明)ê性命。

第15到17節,使徒保羅講基督徒ê行為需要謹慎,這是非常重要ê課題。因為基督徒是帶有上帝形像ê人,是上帝蓋了印記ê人。伊所代表ê已經無koh是伊個人,卻是屬tī基督ê身軀,就ná親像點亮ê燈光一般。伊講基督徒應該「tio̍h像智慧ê人」。所講ê「智慧」,指ê是認bat上帝ê意思。相對tī「智慧」,就是「糊塗人」,mā ē-sái講是對上帝完全m̄-bat ê人。

第18到19節,chit三節經文mā thang看tio̍h早期教會已經有ê聚會型態,就是常常唱詩歌、歌頌上帝。注意第18節提起「m̄-thang酒狂,he是會敗壞人ê」。基督教ê信仰無禁止過lim酒,m̄-koh,tī基督徒ê信仰行為中卻非常強調不准酒狂。使徒保羅講「酒狂」會敗壞人。使徒保羅tī chia講預防酒狂ê siōng好方法,就是hō͘聖神充滿,而且用詩歌o-ló上帝來抵抗人tī chit方面ê軟弱。換句話講,伊希望身為基督徒ê人,tio̍h時常óa靠聖神ê氣力來抵擋chit-ê世界ê誘惑。最後chia mā提起做基督徒ài有凡事感謝ê心。因為基督徒相信tī每一件tāi-chì ê背後,lóng有上帝ê旨意在內面。

重新查詢 專卷研經 以弗所書系列
錯誤回報,請聯繫