以弗所書 5章21節 到 5章33節   背景資料  上一筆  下一筆
Tùi第五章21節到第六章9節,chit段經文是講tio̍h三個主題,包括:第五章21到33節有關夫妻間ê問題;第六章1到4節父母kah子女;第六章5到9節,有關主人kah奴僕(á是奴隸)之間ê關係。這三項lóng是屬tī家庭生活範圍ê部分。Teh談論chit三個問題ê時,lóng有一個特點,就是tùi「bó͘」、「kiáⁿ」、「奴僕」開始講,mā就是先tùi「弱者」開始講起,chiah講「丈夫」、「父母」、「主人」等強者。

第21節,chit節是chit段經文ê序言,mā是chit段論述ê基礎,就是tī「敬畏基督」chit-ê基礎上。

第22到24節,使徒保羅tī chia用「彼此順服」當做討論夫妻關係ê基礎,是kah頭前第18節ê「tio̍h被聖神充滿」chit句話有關係。因為所講ê「順服」是teh指tī聖神引chhōa ê基礎上,卻m̄是因為人ê關係,chit-ê認bat是非常重要ê。因為只有tī聖神引chhōa之下,chiah ē-tàng結出美好ê果子。M̄是人ē-tàng做甚麼,卻是聖神作工,hō͘人重新tńg來到上帝ê救恩裡。因為án-ne,伊teh談夫妻關係ê時,開始就以「敬畏基督」做基礎,當做夫妻彼此順服ê記號,因為án-ne chiah ē-tàng見證夫妻之間有聖神ê充滿。Á「順服」有幾個基本ê態度:1.是甘願放棄一切。2.寧可成做奴僕ê卑微樣式。3.即使是獻上性命mā心甘情願(參考腓立比書二:6—8)。用chit種態度看夫妻關係中ê「順服」ê時,就真清楚à。因為這kā咱講「順服」ê一個siōng基本ê要件就是「甘願」。無「甘願」ê心境,是無算是順服ê。Koh講,使徒保羅kā夫妻ê關係用「教會」做譬喻。伊清楚講tio̍h:耶穌就是教會ê元首,而教會就是基督耶穌ê身軀(參考以弗所書一:22—23)。Bó͘對待丈夫ê態度應該是kā丈夫看做是家庭ê「頭」。M̄-koh,tio̍h注意,使徒保羅並m̄是講丈夫是家庭ê「救主」。

第25到28節,使徒保羅tī chia所用ê「愛」字,是希臘文動詞「Agapao」,chit-ê字ê名詞是「Agape」,意思是teh指無條件、不需任何代價ê「愛」。Chit種「愛」,tī聖經中就是teh指上帝對人類ê「愛」,mā是teh指耶穌tī十字架上ê「愛」。使徒保羅kā chit-ê「Agape」ê「愛」用tī丈夫ê責任上,就是丈夫對bó͘ ê「愛」,就beh親像上帝對人類ê疼仝款,又ài像耶穌獻身tī十字架上ê疼仝款,是lóng無條件、無法度取代、甘願犧牲ê疼。Chit種ê疼mā是無法度用任何條件取代ê。Mā就是講,即使bó͘有任何問題,丈夫iáu一定tio̍h「愛」伊愛到底,直到bó͘往生為止。注意第26節使徒保羅tī chia提起「藉tio̍h伊(基督耶穌)ê話、用水來潔淨教會」,真真明顯是kā丈夫對bó͘ ê疼提升到非常高ê境界,超越肉體上ê需要,á是tī其他外在ê需求,卻是性命ê終極目標,chit-ê認bat非常重要。仝款ê,如果當丈夫ê,無chit種心境去疼家己ê bó͘,婚姻ê關係就會真容易陷入危機中。因為夫妻是性命ê結合體,無chit種認bat,婚姻性命真緊會結束。

第29到33節,tī chit段經文中,使徒保羅用身軀來表明夫妻ê關係,這是取材tī創世記第二章21節到25節所記載:上帝是用人身上ê一條胸坎á骨來造另外一個人。這充分說明一點:cha-bó͘人kah cha-po͘人ê關係是一體ê,無法度分開。因為in彼此ê關係是「骨中骨」、「肉中肉」。第31節是引用創世記第二章24節,夫妻原本就是「一體」,chit種一體m̄是數學ê數字問題,卻是性命ê連結。第32節thang講使徒保羅談chit段夫妻關係ê結語,mā是siōng重要ê一句話,伊講夫妻ê關係,有ná基督kah教會ê關係一般,無法度分開。


重新查詢 專卷研經 以弗所書系列
錯誤回報,請聯繫