以弗所書 2章11節 到 2章22節   背景資料  上一筆  下一筆
Tī耶穌內面,無論是外邦人,á是猶太人,lóng會成做一體,這就是使徒保羅真重要ê信仰告白。Mā就是講:耶穌m̄-nā hō͘所有ê人tńg來到上帝面前,kah上帝和好,mā hō͘所有ê族群結合做伙。人tī耶穌內面,ē-tàng超越種族ê界線,mā超越文化、歷史、地理、傳統等所帶來ê隔閡。咱thang講chit點to̍h是使徒保羅一再強調講ê:「無論甚麼人,若kah 基督結聯,就是新創造ê 人;舊ê tāi-chì 已經過去,taⁿ lóng 變做新ê。(全民版)(哥林多後書五:17)這中心信息就是tī-chia。

第11到13節,tī chia,使徒保羅特別提起外邦人原本m̄是上帝選民,m̄-koh卻tī耶穌內面而kah上帝有親密ê關係。這是因為耶穌ê死所帶來ê救贖恩典。

第14節,chit節真重要,使徒保羅講因為耶穌ê死,已經hō͘外邦人kah猶太人tī耶穌內面「成做一體」。Chia所講ê「平安」,就是大家所熟悉ê「Shalom」ê意思。「平安」,指ê就是無koh有驚惶ê意思。猶太人會beh kā家己kah外邦人區隔出來,主要原因是驚惶接觸tio̍h in,認為in是無清氣ê人,驚惶kah in做伙會引起上帝ê受氣。M̄-koh,使徒保羅講m̄免koh再有chit種驚惶,因為耶穌已經kā「平安」賜hō͘所有信伊ê人,而這「平安」成做猶太人kah外邦人之間siōng重要ê結合劑,並且mā因為chit種結合做伙ê平安,kā原本隔離、分裂ê「牆」hō͘推倒à。

第15到18節,tī chit段經文中,使徒保羅一再強調藉tio̍h耶穌ê十字架,m̄-nā終止了猶太人kah外邦人之間ê對敵形勢,而且beh hō͘二者lóng tńg來到上帝面前。

第19到22節,成做「新人」,這是使徒保羅思想ê中心,伊teh傳福音事工中一再努力beh傳述一個重要信息:tī耶穌內面,無論是外邦人á是猶太人,lóng是上帝ê一家人,無所謂猶太人á是外邦人ê分別。因為耶穌乃是教會ê元首,教會是耶穌ê身軀,因為án-ne,所有信靠耶穌ê人,lóng是建基tī耶穌ê基礎上。無耶穌,就無結合ê中心點,有耶穌,就無所謂外邦人kah猶太人ê分。


重新查詢 專卷研經 以弗所書系列
錯誤回報,請聯繫