以弗所書 2章1節 到 2章10節   背景資料  上一筆  下一筆
Chit章是teh討論一個人若有基督耶穌tī伊ê性命裡,伊應該活出怎樣ê性命。使徒保羅特別強調上帝透過耶穌向所有ê人,無論猶太人á是外邦人,lóng teh顯示祂奇妙ê疼。只要是罪人,lóng需要上帝ê救恩,無任何人例外。

Kā chit段經文kah第一章13節對照來看,就會比較清楚了;tī第一章13節提起信耶穌ê人,是屬tī上帝作印記ê對象,上帝作印記ê主要目的,就是hō͘ chit-ê人ê性命tùi死裡kah耶穌同koh活。Mā就是tī chit章開始所講ê「以前」是死ê,chit-má因為信耶穌成做koh活ê人。使徒保羅講享受chit種恩典ê人,並m̄是因為家己有甚麼能力chiah得tio̍h ê,是憑tio̍h信心得tio̍h ê。信心,是對耶穌絕對ê仰賴,因耶穌改造咱。

第1到3節,tī chit段經文中,使徒保羅真清楚講出猶太人kah外邦人仝款,lóng是生活tī罪惡ê中間。伊ê chit種講法對猶太人聽來是真oh接受ê。因為tī猶太人ê認知中,外邦人才是生活tī罪惡中,而in是kah上帝有割禮chit種「性命ê約」,已經有得救恩典ê人。M̄-koh,使徒保羅則m̄是持chit種看法,伊認為只要是人,lóng是活tī罪惡中。

Tī chit段經文中,咱事(tāi)先看tio̍h ê字眼是「以前」,表示是tī信靠耶穌chìn前。使徒保羅以耶穌做一個分界來詮釋人性命ê無仝情況是,tī耶穌chìn前kah了後,有極大ê性命內涵ê差別。Koh講,tī chit段經文中看tio̍h另外一個字眼,就是「阮」kah「Lín」;如果是用「阮」,所表示ê是teh指猶太人。如果是用「Lín」,對象就是外邦人,á是teh指以弗所教會ê外邦人信徒。

第4到7節,使徒保羅tī chia提起上帝有豐富憐憫ê疼,hō͘所有信耶穌ê人,雖然lóng tī罪惡中死去,卻ē-tàng因為án-ne kah耶穌同koh活,這是上帝賞賜ê特別恩典,是tī耶穌內面顯示出來ê疼。

第8到10節,如果行為ē-tàng hō͘人得救,án-ne就無算是所講ê「恩典」。使徒保羅講tio̍h「恩典」ê時,指ê是:本來m̄是人應該得tio̍h ê,chit-má卻因為耶穌ê緣故,上帝lóng無代價ê就賞賜hō͘人,án-ne chiah是真正恩典ê意思。基督教ê信仰是講因為上帝ê慈愛緣故,tī耶穌內面,上帝願意lóng無條件地賜愛hō͘人類。Án-ne,人是tùi耶穌ê身上白白得tio̍h到這特別ê恩典,因為án-ne,人無法度用之來誇口,只有ē-tàng分享而已。

重新查詢 專卷研經 以弗所書系列
錯誤回報,請聯繫