Chit段經文講摩西死了後，約書亞繼續帶領以色列人民進入迦南應允之地。

第5到8節，摩西kah一般人siōng大無仝ê所在，就是伊ê喪禮是上帝親自為伊舉辦ê。因為上帝替伊埋葬tī摩押山谷，所以無人ē-tàng知影摩西埋葬ê地點。伊死ê時chūn是一百二十歲，m̄-koh續落來chit句：「猶原強健，視力真好」，表示摩西結束性命ê時，並m̄是身軀有甚麼問題。其實chit句「視力真好」，就是teh指身軀iáu-koh健壯ê意思。以色列人民為伊舉哀長到三十工，表示對伊深深ê懷念。

第9節，chit節是紹介約書亞，伊「充滿智慧」，聖經作者teh講「智慧」ê時，意思是teh指「認bat」上帝。而且chia特別強調約書亞因為有摩西tī眾人面前為伊按手，以色列人民就完全信任、接受伊ê領導，表示願意遵行上主藉tio̍h摩西頒hō͘ in ê誡命。

第10到12節，chit三節是對摩西「蓋棺論定」。伊m̄-nā是一位偉大ê先知，而且一位深得上帝器重ê先知，因為伊m̄-nā bat kah上帝面對面講話，而且ē-tàng行神跡奇事。因為án-ne，chia講「以色列中從來m̄-bat有像摩西hit種ê先知」，chit句話hō͘伊siōng崇高ê敬意。